کراچی : شہر قائد میں ڈکیتی کی ایک اور واردات کے دوران شہری نے فائرنگ کرکے ڈاکو ہلاک کردیا، جبکہ اس کا ساتھی فرار ہونے میں کامیاب ہوگیا۔
اے آر وائی نیوز کراچی کے نمائندے عدنان راجپوت کی رپورٹ کے مطابق اس حوالے سے پولیس حکام کا کہنا ہے کہ سہراب گوٹھ میں ڈکیتی اور فائرنگ کا واقعہ پیش آیا ہے۔
پولیس کے مطابق کراچی کے علاقے سہراب گوٹھ میں شہری کی فائرنگ سے مبینہ ڈاکو ہلاک ہوگیا ہے، ہلاک ہونے والا ملزم پنجاب بس اڈے کے قریب اپنے ساتھی کے ساتھ لوٹ مار کررہا تھا۔
لوٹ مار کے دوران ایک شہری نے موقع پاتے ہی اپنی پستول سے ڈاکو پر گولی چلادی جو زخمی ہوکر زمین پر گیا جبکہ اس کا ساتھی موقع سے فرار ہونے میں کامیاب ہوگیا۔
واقعے کی اطلاع ملتے ہی پولیس ٹیم جائے وقوعہ پر پہنچی اور زخمی ڈاکو کو فوری طور پر اسپتال منتقل کیا جہاں دوران علاج ڈاکو زیادہ خون بہہ جانے اور زخموں کی تاب نہ لاتے ہوئے ہلاک ہوگیا۔
پولیس کے مطابق واقعے کا مقدمہ درج کرلیا گیا ہے تاہم ابھی ہلاک ہونے والے ڈاکو کی شناخت نہیں ہو سکی ہے، مزید تحقیقات جاری ہیں۔
مزید پڑھیں : کراچی میں ڈاکوؤں کی فائرنگ سے 14 سالہ لڑکا جاں بحق، 1 ملزم ہلاک
یاد رہے کہ اس سے قبل گزشتہ ہفتے کراچی کے علاقے گلشن احباب پاکستان بازار تھانے کی حدود میں راہ گیر سے ڈکیتی کے دوران وہاں موجود ایک شہری شہنشاہ حسن نے اپنی ذاتی لائسنس یافتہ اسلحہ سے ملزمان پر فائرنگ کی۔
شہری کی فائرنگ سے ایک ملزم موقع پر ہلاک ہوگیا جبکہ دوسرا زخمی حالت میں فرار ہونے میں کامیاب ہوگیا تھا۔ جبکہ ڈاکو کی فائرنگ سے ایک 14 سالہ لڑکا جاں بحق ہوگیا تھا۔
