سعودی عرب میں محکمہ موسمیات کا کہنا ہے کہ آج ملک کے بیشتر علاقوں میں بارش کا امکان ہے، جبکہ بعض میں گرد و غبار اور تیز ہوائیں بھی چل سکتیں ہیں جس کے ساتھ حد نگاہ بھی متاثر ہوسکتی ہے۔
سعودی خبر رساں ادارے کی رپورٹ کے مطابق مکہ مکرمہ ریجن کے شہر طائف کے لیے محکمہ موسمیات نے ریڈ الرٹ جاری کردیا ہے۔
محکمہ موسمیات کے مطابق طائف میں دوپہر 12 بجے سے رات 10 بجے تک گرج چمک کے ساتھ تیز بارش کی توقع ہے۔
رپورٹس کے مطابق مکہ مکرمہ شہر کے علاوہ میسان، مدرکہ، تربہ اور المویہ میں ہلکی اور درمیانے درجے کی بارش کا امکان ہے۔
محکمہ نے مدینہ منورہ ریجن کے رہائشیوں کو بھی خبردار کیا ہے کہ دو پہر 12 سے رات 10 بجے تک المہد، الحناکیہ، خیبر، وادی الفرع اور مدینہ منورہ شہر میں درمیانے درجے کی بارش ہوسکتی ہے۔
جازان، عسیراور الباحہ ریجنوں کے متعدد شہروں تک بارش کا سلسلہ پھیل سکتا ہے جہاں بعض بالائی علاقوں میں اولے بھی گر سکتے ہیں۔
واضح رہے کہ رواں ہفتے میں کویت، سعودی عرب اور اردن کے کئی علاقوں کو گردو غبار کے طوفان نے متاثر کیا تھا، کویت میں خراب موسم کے باعث تین پروازوں کو دمام میں اتارا گیا تھا۔
رپورٹ کے مطابق گردو غبار کے طوفان باعث کویت انٹرنیشنل ایئرپورٹ پر حفاظی اقدامات کے تحت پروازوں کو دمام جانے کی ہدایت کی گئی تھی۔
کویتی سول ایوی ایشن کے مطابق مسافروں کی سلامتی کے پیش نظر احتیاطی اقدامات کے تحت مصر کے شہر قاہرہ اور اسیوط سے کویت آنے والی پروازوں کو دمام روانہ کیا گیا تھا۔
عازمین حج کی سہولت کیلیے مسجد الحرام کی لائبریری میں اقدامات
کویت میں ان دنوں موسم شدید غبار آلود ہے جس سے حد نگاہ متاثر ہوتی ہے، ہوا کی رفتار بھی 35 ناٹیکل میل (70 کلو میٹر فی گھنٹہ) سے زائد ہے جس کی وجہ سے حد نگاہ بھی 300 میٹر سے کم تھی۔
