جمعیت علمائے اسلام نے کل بروز جمعہ کو دفاع وطن منانے کا اعلان کیا ہے۔
جے یو آئی سربراہ مولانا فضل الرحمان نے علما سے خطبوں میں بھارتی جارحیت کی مذإت کی قرارداد منظور کرنے کی اپیل کی اور کہا کہ وطن کے دفاع کے لیے ہر قربانی دینے کے عزم کا اظہار کریں۔
مولانا فضل الرحمان نے کہا کہ وطن کے دفاع کے لیے ہم سب ایک ہیں، ہماری بہادر فوج وطن کے دفاع کے لیے دشمن کے سامنے کھڑی ہے۔
انہوں نے کہا کہ دشمن کے خلاف پوری قوم متحد ہے۔
یہ پڑھیں: جماعت اسلامی کا پاک فوج سے اظہار یکجہتی کیلیے مظاہروں کا اعلان
واضح رہے کہ بھارت کو بزدلانہ حملے کا کرارا جواب دینے پر جماعت اسلامی کراچی نے بھی پاک فوج سے اظہار یکجہتی کیلیے کل شہر قائد میں مظاہروں کا اعلان کیا ہے۔
امیر جماعت اسلامی کراچی منعم ظفر نے پریس کانفرنس میں کہا کہ بھارتی دہشتگردی کے خلاف پوری قوم متحد ہے، صبح 10 بجے سے تعلیمی اداروں میں اظہار یکجہتی ہوگا، ہماری افواج نے بھارتی جارحیت کا بھرپور مقابلہ کیا۔
ان کا کہنا تھا کہ اسرائیل غزہ میں بمباری کر کے نوجوانوں اور بچوں کو شہید کر رہا ہے، اقوام متحدہ اسرائیل کو روکنے کیلیے کردار ادا نہیں کر رہا، اقوام متحدہ کو بھارت اور اسرائیل کے خلاف کردار ادا کی ضرورت ہے۔
گزشتہ روز امیر جماعت اسلامی پاکستان حافظ نعیم الرحمان کی زیرِ صدارت مرکزی قیادت کے ہنگامی اجلاس میں بھارت کے بزدلانہ حملوں کے خلاف 9 مئی کو ملک گیر یوم عزم منانے کا اعلان کیا گیا تھا۔ جمعہ کے روز ملک بھر میں بھارتی جارحیت کے خلاف احتجاجی ریلیاں نکالی جائیں گی۔
