دہلی: بھارت کے دارالحکومت دہلی میں اتوار کی صبح تیز آندھی، گرج چمک کے ساتھ موسلا دھار بارش نے تباہی مچا دی ہے۔
تفصیلات کے مطابق دہلی میں گرج چمک کے ساتھ دھواں دھار بارش کافی نقصان کا سبب بن گیا ہے، دہلی ایئر پورٹ کی چھت کو بھی نقصان پہنچا۔
رپورٹس کے مطابق اس طوفانی موسم کے اثرات سے ہمیشہ مصروف رہنے والے اندرا گاندھی بین الاقوامی ہوائی اڈے کے ٹرمینل-ون کو جزوی طور پر نقصان پہنچا ہے، ایئرپورٹ کی چھت سے اچانک پانی ٹپکنے اور ایک حصے کے متاثر ہونے کے مناظر سوشل میڈیا پر وائرل ہو گئے ہیں۔
رات بھر ہونے والی شدید بارش کے سبب 17 بین الاقوامی پروازوں سمیت کل 49 پروازوں کا رخ موڑ دیا گیا، 180 سے زائد پروازیں منسوخ ہو گئیں۔ بھارتی میڈیا رپورٹس کے مطابق شمالی اور شمال مغربی دہلی کے بڑے حصوں میں بجلی کی سپلائی بھی متاثر ہوئی۔
دہلی میں مون سون کے موسلا دھار اسپیل میں 82 کلو میٹری فی گھنٹہ کی رفتار سے ہواؤں میں 81 ملی میٹر بارش نے بھارتی دارالحکومت کو ڈبو دیا ہے، نکاسی آب کے ناقص نظام کے باعث انڈر پاسز میں پانی بھرنے سے گاڑیاں تباہ ہو گئیں، سڑکوں پر پانی جمع ہونے سے ٹریفک کا نظام بھی درہم برہم ہو گیا ہے۔
دہلی کے علاقے انکور وہار میں اے سی پی کے آفس میں غازی آباد پولیس کے سب انسپکٹر وریندر مشرا کی اس وقت موت واقع ہو گئی جب تیز بارش کی وجہ سے دفتر کی چھت اچانک ڈھ گئی، جس کے نیچے وہ سو رہے تھے۔
دی نیو انڈین ایکسپریس کے مطابق ہندوستان کے محکمہ موسمیات نے کہا ہے کہ دہلی میں مئی کی اب تک کی سب سے زیادہ بارش ریکارڈ کی گئی ہے، اس سال 25 مئی تک 186.4 ملی میٹر بارش ریکارڈ کی گئی ہے۔
