ترک صدر رجب طیب اردوان کا وزیرِاعظم پاکستان شہباز شریف اور وفد کے دورہ ترکیہ سے متعلق اہم بیان سامنے آیا ہے۔
غیر ملکی ذرائع ابلاغ کے مطابق ترک صدر نے کہا میزبانی کر کے خوشی ہوئی، وزیرِاعظم پاکستان کے ساتھ کئی اہم امور پر تبادلہ خیال کیا، شہباز شریف اور ان کے وفد کے ساتھ معیشت، تجارت اور سلامتی پر تفصیلی گفتگو ہوئی۔
اُنہوں نے کہا کہ ترکیہ اور پاکستان کے درمیان تعلقات کو ہر شعبے میں مزید مضبوط بنانے پر زور دیا گیا۔
رجب طیب اردوان کا کہنا تھا کہ وزیرِ اعظم پاکستان شہباز شریف کے ذریعے پاکستانی بھائیوں کو محبت کا پیغام دیتا ہوں، شہباز شریف اور ان کے وفد کا ترکیہ کے دورے کا شکریہ ادا کرتا ہوں۔
رجب طیب اردوان کا مزید کہنا تھا کہ اللّٰہ تعالیٰ ہماری یکجہتی اور بھائی چارے کو قائم رکھے۔
دوسری جانب وزیراعظم شہباز شریف نے دورہ ترکیہ کے دوران ترک صدارتی محل میں صدر رجب طیب اردوان سے ملاقات کی اور تعاون پر شکریہ اداکیا۔
ترک میڈیا نے بتایا کہ پاکستان کے وزیراعظم شہباز شریف اور رجب طیب اردوان کی ملاقات ہوئی، ملاقات میں پاک ترک تعلقات پر تبادلہ خیال کیا گیا، شہباز شریف نے ترکیہ کی مسلسل حمایت اور تعاون پر شکریہ ادا کیا۔
ترک میڈیا نے بتایا کہ دونوں رہنماؤں نے دوطرفہ تعلقات کو مزید مستحکم کرنے پر اتفاق کیا ہے، علاقائی امن اور دہشت گردی کیخلاف مشترکہ کوششوں پر بھی زور دیا گیا۔
وزیراعظم اور ترک صدر نے وفود کی سطح پر بھی ملاقات کی، وفد میں فیلڈ مارشل سید عاصم منیر بھی موجود تھے۔
بھارتی خواتین نے مودی کے جنگی بیانیے کی دھجیاں اڑا دیں
ترک میڈیا نے بتایا کہ وزیراعظم شہباز شریف کے وفد میں نائب وزیراعظم اسحاق ڈار، وفاقی وزیراطلاعات عطاتارڑ اور طارق فاطمی بھی شامل تھے۔
