برطانیہ میں پاکستانی ہائی کمیشن پر حملہ کرنے والے بھارتی نژاد ملزم کو عدالت میں پیش کردیا، ملزم نے عدالت سے رحم کی اپیل کرتے ہوئے کہا کہ حملے کے وقت میں ذہنی طور پر پریشان تھا۔
غیر ملکی ذرائع ابلاغ کے مطابق برطانیہ میں پاکستانی ہائی کمیشن پر حملہ کرنے والے بھارتی نژاد انکیت لو نے ویسٹ منسٹر مجسٹریٹس کی عدالت میں پیشی پر بیان دیا کہ پاکستانی ہائی کمیشن پر حملے کے وقت ذہنی تناؤ میں مبتلا تھا۔
ملزم نے اپنے بیان میں کہا کہ وہ بھارتی ہائی کمیشن کی عمارت کے شیشے بھی توڑ چکا ہے۔ والدین کو مقبوضہ جموں و کشمیر میں قتل کیا گیا جس کا اس پر گہرا اثر پڑا۔
بھارتی نژاد ملزم انکیت لو نے عدالت سے اپیل کی کہ اس کی ذہنی کیفیت اور پس منظر کو مدنظر رکھا جائے۔
واضح رہے کہ گزشتہ ماہ لندن میں پاکستانی ہائی کمیشن کی عمارت پر حملہ کر کے کھڑکیوں کے شیشے توڑنے کے جرم میں ایک شخص کو گرفتار کیا تھا۔
ہائی کمیشن کی عمارت پر پتھر پھینک کر کھڑکیوں کے شیشے توڑے گئے تھے جبکہ بلڈنگ کے اوپر ہندو مذہب سے منسلک زعفرانی رنگ بھی پھینکا گیا تھا۔
لندن پولیس نے موقع پر پہنچ کر فوری طور پر ایک شخص کو گرفتار کر کے پولیس اسٹیشن منتقل کردیا تھا، پولیس نے فوری طور پر ملزم کی شناخت ظاہر نہیں کی تھی۔
بھارت سے وطن واپسی پر پاکستانی ہائی کمیشن کے عملے کو ہراسانی کا سامنا
حملہ ایک ایسے وقت میں کیا گیا تھا جب پاکستانی کمیونٹی بھارتی ہائی کمیشن کے سامنے احتجاج کرنے والی تھی۔
