ادارہ امور حرمین نے دنیا بھر کے مسلمانوں کی سہولت کے لیے امسال خطبہ حج کا ترجمہ 35 مختلف زبانوں میں براہ راست نشر کرنے کا اعلان کیا ہے۔
عرب میڈیا کے مطابق میدان عرفات مسجد نمرہ سے خطبہ حج اس سال 35 زبانوں میں ترجمے کے ساتھ براہ راست نشر کیا جائے گا۔ اس سے 50 لاکھ مسلمان مستیفض ہو سکیں گے
دینی امور کے سربراہ شیخ عبدالرحمان السدیس نے کہا ہے کہ ’حرمین شریفین سے اسلام کا میانہ روی و اعتدال پسندی کا پیغام دنیا بھر میں پہنچانے کے لیے اس سال 35 عالمی زبانوں میں خطبہ حج کے ترجمے کا انتظام کیا گیا ہے۔‘
’ادارہ امور حرمین نے جامع منصوبہ مرتب کیا اور ایک مستقل کمیٹی تشکیل دی گئی تاکہ ضیوف الرحمان کی بہتر طریقے سے رہنمائی اور دنیا بھر میں اسلام کے حقیقی پیغام کو پہنچایا جائے۔‘
امسال حج کا رکن اعظم وقوف عرفات جمعرات 5 جون کو ہوگا اور اسی روز خطبہ حج ادا دیا جاتا ہے۔ اس سال ایوان شاہی نے خطبہ حج کی ذمہ داری شیخ ڈاکٹر صالح بن حمید کے سپر کی ہے۔
واضح رہےعرفات میں واقع مسجد نمرہ میں سب سے زیادہ خطبہ حج دینے والوں میں سعودی عرب کے مفتی اعظم شیخ عبدالعزیز آل الشیخ ہیں، جنہوں نے 34 مرتبہ خطبہ حج دیا۔ ان کے بعد شیخ عبداللہ بن حسن آل الشیخ 25 مرتبہ یوم عرفہ پر خطبہ دے چکے جب کہ گزشتہ برس یہ ذمہ داری شیخ ماہر المعیقلی کے سپرد کی گئی تھی۔
