تل ابیب: اسرائیل کے وزیر دفاع یسرائیل کاٹز نے کہا ہے میکرون اور ان کے دوست کاغذ پر فلسطینی ریاست کو تسلیم کریں گے اور ہم یہاں زمین پر یہودی ریاست قائم کر دیں گے۔
غیر ملکی میڈیا رپورٹس کے مطابق اسرائیلی وزیر دفاع نے ایمانوئل میکرون اور دیگر یورپی رہنماؤں کو دھمکی دی ہے کہ اگر انھوں نے فلسطینی ریاست کو تسلم کرنے کا اعلان کیا تو وہ مغربی کنارے پر یہودی ریاست قائم کر دیں گے۔
یسرائیل کاٹز کا کہنا تھا کہ حماس ’’مجبور‘‘ ہے کہ وہ امریکی ایلچی وٹکوف کی تجویز کو قبول کرے یا پھر اپنے خاتمے ہی کو چُنے۔
مقبوضہ علاقوں میں 22 نئی بستیوں کے قیام کے اعلان کے بعد اب وزیر دفاع نے کہا ہے کہ اسرائیل مغربی کنارے میں ’’ یہودی ریاست اسرائیل‘‘ قائم کرے گا، کاٹز نے اپنے دفتر سے جاری ایک بیان میں مزید کہا کہ یہ حماس جیسی تنظیموں کے لیے فیصلہ کن جواب ہے جو ہمیں نقصان پہنچانے اور اس سرزمین پر ہماری گرفت کو کمزور کرنے کی کوشش کر رہی ہیں۔
غزہ کو اسرائیل کے رحم و کرم پر چھوڑ دیا تو مغرب ساکھ کھو دے گا، میکرون نے خبردار کر دیا
انھوں نے کہا یہ میکرون اور ان کے دوستوں کے لیے بھی ایک واضح پیغام ہے، کہ وہ کاغذ پر فلسطینی ریاست کو تسلیم کریں گے اور ہم یہاں زمین پر یہودی ریاست قائم کریں گے۔
واضح رہے کہ فرانسیسی صدر میکرون نے جمعہ کے روز کہا ہے کہ فلسطینی ریاست کو تسلیم کرنا صرف اخلاقی ذمہ داری نہیں بلکہ ایک سیاسی مطالبہ بھی ہے۔
میکرون نے سنگاپور میں وزیر اعظم لارنس وونگ کے ساتھ ایک پریس کانفرنس کے دوران کہا کہ اگر اسرائیل آنے والے دنوں میں غزہ کے انسانی بحران سے متعلق کوئی قدم نہیں اٹھاتا تو یورپیوں کو اسرائیل کے بارے میں اپنے اجتماعی مؤقف کو سخت کر دینا چاہیے، اور اسرائیل پر پابندیاں عائد کرنی چاہیئں۔
