تھائی لینڈ کے معروف سیاحتی مقام ٹائیگر کنگڈم میں ایک دل دہلا دینے والا واقعہ پیش آیا، جہاں ایک بھارتی سیاح پر شیر نے اچانک حملہ کر دیا۔
آج کے اس دور میں ایڈونچر کرنا کسے پسند نہیں لیکن کسی بھی ایڈونچر قبل اپنی ہمیشہ اپنی حفاظت کو یقینی بنائیں، ایک افسوسناک واقعہ تھائی لینڈ کے خوبصورت جزیرے پُوکیٹ میں پیش آیا۔
اس پارک میں سیاحوں کو شیروں کے قریب جا کر انہیں چھونے، کھلانے اور سیلفی لینے کی اجازت دی جاتی ہے، تاہم یہی قربت اس بار ایک سیاح کیلئے بہت خطرناک ثابت ہوئی ہے۔
سوشل میڈیا پر وائرل ہونے والی ویڈیو میں ایک بھارتی نوجوان کو زنجیروں میں بندھے شیر کے ساتھ پرسکون انداز میں چلتے ہوئے دیکھا جاسکتا ہے، اس کے ساتھ ایک شخص بھی موجود تھا جو غالباً ٹرینر تھا اور ہاتھ میں چھڑی تھامے ہوئے نظر آرہا ہے۔
نوجوان شیر کو تھپتھپا کر شاید تصویر کے لیے پوز دے رہا تھا، لیکن اچانک شیر نے غصے میں آکر اس پر حملہ کر دیا، یہ حملہ اتنا غیر متوقع تھا کہ وہاں موجود تمام لوگ خوف زدہ ہو گئے، خوش قسمتی سے نوجوان کی جان بچ گئی لیکن وہ بری طرح زخمی ہوگیا۔
دوسری جانب پارک کے مقامی حکام کی جانب سے اس واقعے کی باضابطہ تصدیق نہیں کی گئی، تاہم متعدد رپورٹس کے مطابق یہ افسوسناک واقعہ پُوکیٹ کے ٹائیگر کنگڈم میں ہی پیش آیا، جہاں اس طرح کی سرگرمیوں کی کھلی اجازت ہوتی ہے۔
