یلدرم کا یہ افسانہ ایک ایسے آدمی کو سامنے لاتا ہے، جسے اپنے دوست کا ایک خط موصول ہوتا ہے۔ وہ اس خط کو بہت محبت سے اپنے سینے سے لگاتا ہے اور سوچتا ہے کہ اس خط کو کتنے نمبر دے؟ مگر وہ جب بھی نمبر دیتا ہے، ہر بار سو سے زیادہ نمبر دے دیتا ہے۔ یہ افسانہ پیشِ خدمت ہے۔

تُو پیارے دوست کا پیارا خط ہے! تجھ میں وہ کونسی برقی شے بھری ہے جو میرے دل کو دھڑکاتی ہے! تجھے کھولتے وقت ہاتھ کیوں کانپنے لگتے ہیں؟ آخر تجھ میں اور کاغذوں سے کیا برتری ہے؟ تو بھی کاغذ کا ٹکڑا وہ بھی کاغذ کے ٹکڑے، بلکہ وہ تجھ سے زیادہ بڑے ہیں۔ ہاں باعث تفاخر و تفوق یہی ہے نا کہ دوست نے تجھے لکھا، لب پان خوردہ سے اف، لب پان خوردہ سے لفافہ بند کیا؟ بیشک، بیشک، یہ بہت بڑا تفوق ہے۔ اچھا میں تیرا امتحان لیتا ہوں، تجھے نمبر دیتا ہوں۔ سو میں دیکھوں تجھے کتنے نمبر ملتے ہیں۔

ان کے ہاتھوں سے چھوئے جانے کے۔۔۔ چالیس

اس بات کے کہ دستۂ کاغذ میں سے تجھے ہی منتخب کیا۔۔۔ پچاس

ان لبوں نے لفافہ کو بند کیا۔۔۔ ستّر

ہیں! تُو نے سو سے زیادہ نمبر پائے۔ نہیں، یہ امتحان ٹھیک نہیں ہوا، دوسرے طریقے سے شمار ہونا چاہیے۔

اس بات کے کہ تجھے میرے لیے منتخب کیا اور کسی دوسرے کے لیے نہیں منتخب کیا۔۔ ساٹھ

اس بات کے کہ ان کے قلم کی تحریر تجھ پر ہے۔۔۔ چالیس

اس بات کے کہ ان کے چہرے کا عکس تجھ پر پڑا کیوں کہ وہ فرماتے ہیں کہ یہ خط رات کو لکھا ہے۔۔۔ پانچ سو

کیا! پھر سو سے زیادہ ہو گئے؟ یہ ٹھیک نہیں، اچھا تیسری بار پھر امتحان۔

اس بات کے کہ تو ان کے مژدہ صحت و خوشنودی مزاج کی خبر لایا۔۔۔ اسی

اس بات کے کہ تجھے چاک کر دیے جانے کا حکم ہے۔۔۔ دس ہزار

یہ کیا؟ نمبر تو سو سے پھر بڑھ گئے۔

نہیں نہیں! میں بے فائدہ کوشش نہیں کرنے کا، تُو امتحان سے بالا، موازنہ سے اعلیٰ، قید مقابلہ مقائسہ سے آزاد، پیارے دوست کا پیارا پیارا، ہائے میں کیسے ظاہر کروں کتنا پیارا خط ہے، تُو سینہ سے لگایا جائے گا۔ تُو نظرِ اغیار سے بچایا جائے گا، مگر (حاشا) تو چاک نہیں کیا جائے گا۔ تُو میرے پاس محفوظ رہے گا اور میں ہزاروں مرتبہ تجھے تنہا گوشوں میں پڑھوں گا۔