بلوچستان کے ضلع کچھی کے علاقے کولپور میں سیکیورٹی فورسز کے انٹیلیجنس بیسڈ آپریشن میں فتنہ الہندوستان کے 2 دہشت گرد مارے گئے۔
پاک فوج کے شعبہ تعلقات عامہ (آئی ایس پی آر) کے مطابق آپریشن بھارتی پراکسی فتنہ الہندوستان کے دہشت گردوں کی موجودگی پر کیا گیا، ہلاک دہشت گردوں سے اسلحہ اور گولہ بارود بھی برآمد کرلیا گیا۔
ترجمان پاک فوج کا کہنا ہے کہ ہلاک دہشت گرد متعدد بھارتی اسپانسر شدہ دہشت گردانہ سرگرمیوں میں سرگرم رہے۔
آئی ایس پی آر کا کہنا ہے کہ علاقے میں دہشت گردوں کو ختم کرنے کے لے سینیٹائزیشن آپریشن جاری ہے، فورسز ملک سے بھارتی اسپانسر شدہ دہشت گردی کی لعنت کو ختم کرنے کے لیے پرعزم ہیں۔
وزیراعظم شہباز شریف نے فتنہ الہندوستان کے دو دہشت گرد ہلاک کرنے پر سیکیورٹی فورسز کو خراج تحسین پیش کیا ہے۔
انہوں نے کہا کہ سیکیورٹی فورسز کی مہارت سے دہشت گردی کی جڑیں اکھاڑ پھینکیں گے، دہشت گردوں کو معصوم شہریوں کو نقصان پہنچانے کی بھارتی قیمت چکانی پڑے گی۔
شہباز شریف کا کہنا تھا کہ ملک سے دہشت گردی کے خاتمے کے لیے فورسز اور حکومت پرعزم ہیں۔
