کراچی: شہر قائد کے 4 اضلاع کی مکمل پولیس مانیٹرنگ شروع ہو گئی، 7 پاپ سائٹس پر اہلکار تعینات کر دیے گئے۔
تفصیلات کے مطابق سیف سٹی پراجیکٹ کے پہلے فیز کا آغاز ہو گیا، آئی جی سندھ غلام نبی میمن کے احکامات پر کراچی پولیس کے 51 اہلکاروں کو 7 پاپ سائٹس پر تعینات کر دیا گیا۔
ڈی جی سیف سٹی آصف اعجاز شیخ کے مطابق 3 شفٹوں میں 4 ڈسٹرکٹس کی مکمل مانیٹرنگ شروع کر دی گئی ہے، اور 5 خصوصی ایمرجنسی رسپانس وہیکلز کو بھی پاپ سائٹس پر پہنچا دیا گیا ہے۔
کراچی رینج کی نفری آئی جی سندھ کے احکامات پر مختص کی گئی ہے، اور سیف سٹی پراجیکٹ کی 7 پاپ سائٹس کو آپریشنل کیا گیا ہے، جہاں 51 اہلکاروں کو تین شفٹوں میں تعینات کیا گیا ہے۔
ہر پاپ سائٹ پوائنٹ پر 4 اہلکار 8 گھنٹے ڈیوٹی پر مامور ہوں گے، جہاں پولیس اور ٹریفک پولیس نے اپنا کام شروع کر دیا ہے، مذکورہ اضلاع میں ایسٹ، ملیر، ساؤتھ اور سٹی شامل ہیں جہاں میں مکمل مانیٹرنگ شروع ہو گئی ہے۔
کراچی میں فائرنگ کے تبادلے میں بھتہ خور گینگ کا سرغنہ مارا گیا
آرٹلری میدان، سول لائنز اور بوٹ بیسن پاپ سائٹس پر کنٹرول روم ہوگا، عزیز بھٹی، فیروز آباد، ایئرپورٹ، ٹیپوسلطان تھانے سے بھی مانیٹرنگ ہوگی، کنٹرول روم میں ڈسٹرکٹ اور ٹریفک پولیس کی نفری موجود ہوگی۔
شاہین کمپلیکس داتا کارنر اور پیپلز اسکوائر پر 24 گھنٹے نفری تعینات ہوگی، اسٹاک ایکسچینج اور حبیب بینک پلازہ کے قریب ای آر وی موجود ہوں گی، خصوصی ایمرجنسی رسپانس وہیکل 24 گھنٹے 3 شفٹوں میں موجود ہوں گی، ڈی جی سیف سٹی آصف اعجاز شیخ کے مطابق سیف سٹی کے لیے اہل کاروں کو تربیت بھی دی جا رہی ہے۔
