اسرائیلی فوج نے جنوبی غزہ میں 45 فلسطینیوں کو اُس وقت حملہ کر کے شہید کر دیا جب وہ امدادی مرکز پر امداد کے انتظار میں موجود تھے۔
قطری نشریاتی ادارے الجزیرہ کی رپورٹ کے مطابق اسرائیلی فوج نے شہر خان یونس کے علاقے التحلیہ میں امداد کے انتظار لوگوں پر فائرنگ کی جس میں 45 فلسطینی شہید اور درجنوں زخمی ہوگئے۔
غزہ میں وزارت صحت نے کہا کہ ناصر میڈیکل کمپلیکس میں ایمرجنسی، انتہائی نگہداشت اور آپریٹنگ رومز بڑی تعداد میں لاشوں اور زخمیوں سے بھرے ہوئے ہیں۔
یہ بھی پڑھیں: امریکا نے فلسطینیوں کی امداد کرنے والی تنظیموں اور افراد پر پابندی لگا دی
اسرائیلی فوج کی جانب سے تازہ قتل عام غزہ ہیومینٹیرین فاؤنڈیشن کے زیر انتظام متنازع امدادی مراکز پر کیا گیا جسے امریکا اور اسرائیل کی حمایت حاصل ہے اور یہ ان علاقوں میں کام کرتی ہے جو اسرائیلی فوج کے زیر کنٹرول ہیں۔
اقوام متحدہ کے انسانی حقوق کے سربراہ وولکر ترک نے پیر کے روز کہا کہ اسرائیل کے جنگ کے طریقے غزہ میں فلسطینیوں کو خوفناک اور ناقابل برداشت تکلیف میں مبتلا کر رہے ہیں۔
واضح رہے کہ فلسطینی مزاحمتی تنظیم حماس کے ساتھ پچھلے 20 ماہ سے زائد عرصے سے جاری جنگ کے دوران اسرائیل اب تک 55 ہزار سے زائد فلسطینیوں کو شہید کر چکا ہے جن میں ہزاروں بچے، خواتین اور بوڑھے شامل ہیں۔
