راولپنڈی: فیلڈ مارشل آرمی چیف جنرل عاصم منیر کا کہنا ہے کہ بحیثیت قوم ہم پاکستانی کبھی بھی بھارت کے آگے جھکے ہیں اور نہ جھکیں گے، دشمن کی اجارہ داری قبول نہیں۔
فوج کے شعبہ تعلقات عامہ (آئی ایم پی آر) کے مطابق سول سروسز اکیڈمی کے 52ویں کامن ٹریننگ پروگرام کے شریک سے افسران خطاب کرتے ہوئے فیلڈ مارشل آرمی چیف جنرل عاصم منیر نے کہا کہ ملک کی ترقی اور کامیابی کیلیے عوام، حکومت اور افواج کے درمیان مضبوط تعلق ناگزیر ہے، ریاست کی تمام اکایئوں کے درمیان ہم آہنگی کی اساس پاکستان کی انتظامیہ اور سول بیوروکریسی ہے اس کی بھاری اور اہم ذمہ داری آپ پر عائد ہوتی ہے، معرکہ حق میں ریاست کی تمام اکایئوں نے مثالی ہم آہنگی کا مظاہرہ کیا، اس میں پاکستان نے کشمیر لائن آف کنٹرول سے لے کر ساحل سمندر تک بھارت کی بلا جواز جارحیت کے خلاف بہترین جواب دیا، اللّٰہ نے معرکے میں ہماری مدد کی کیونکہ ہم حق پر تھے، افواج پاکستان دور حاضر کے جنگی تقاضوں کے مطابق اپنے آپ کو ہمہ وقت تیار رکھتی ہیں۔
یہ بھی پڑھیں: فیلڈ مارشل عاصم منیر شاندار شخصیت کے مالک ہیں، امریکی صدر
فیلڈ مارشل عاصم منیر نے کہا کہ ہم بھارت کو واضح پیغام دیتے ہیں کہ پاکستان نے پہلے اس کی اجارہ داری قبول کی اور نہ کبھی کرے گا، دہشتگردی بھارت کا اندرونی مسئلہ ہے جو اس کا اپنی اقلیتوں اور بالخصوص مسلمانوں پر متعصبانہ اور ظالمانہ رویوں کا نتیجہ ہے، خطے میں دہشتگردی کا سب سے بڑا سر پرست بھارت ہے، بحیثیت قوم ہم پاکستانی کبھی بھی بھارت کے آگے جھکے ہیں اور نہ جھکیں گے۔
سپہ سالار نے کہا کہ افغانستان ہمارا برادر پڑوسی اسلامی ملک ہے اور ہم اس سے اچھے تعلقات چاہتے ہیں تاہم ہم اُن سے ایک ہی تقاضا کرتے ہیں کے وہ بھارت کی دہشتگردانہ پروکسیوں فتنہ الہندوستان اور فتنہ الخوارج کو جگہ نہ دیں۔
انہوں نے کہا کہ اپنی انفرادی اور علاقائی پہچان سے بڑھ کر پاکستانیت کی پہچان کو اپنائیں، ہر نظام میں مسائل اور کمزوریاں ہوتی ہیں آپ کا کام ہے کے کمزوریوں اور منفی قوتوں کو نظام پر حاوی نہ ہونے دیں، جو اقوام اپنی تاریخ کو بھول جاتی ہیں ان کا مستقبل بھی تاریک ہو جاتا ہے، پاکستان کی کہانی اور تاریخ کو جانیے اور اپنی اگلی نسلوں تک پہنچائیں، ملک سے محبت اور وفاداری اولین اور بنیادی شرط ہے، اپنے اندر جرات، قابلیت اور کردار پیدا کریں اور اگر ان میں سے ایک جزو کو چننا ہو تو ہمیشہ کردار کو فوقیت دیجیے گا۔
قبل ازیں، فیلڈ مارشل آرمی چیف جنرل عاصم منیر نے 52ویں کامن ٹریننگ پروگرام کے شریک افسران نے ملاقات کی جس میں افسران نے زمانہ امن کے دوران کشمیر، خیبر پختونخوا اور بلوچستان کے آپریشنل علاقوں میں پاک فوج کی مختلف فارمیشنز کے ساتھ وقت گزارا اور تینوں مسلح افواج کے خدمات کی انجام دہی کے دوران تجربات حاصل کیے۔
آئی ایس پی آر کے مطابق فیلڈ مارشل آرمی چیف جنرل عاصم منیر نے اس موقع پر مقصد ادارہ جاتی ہم آہنگی کو بہتر بنانے اور سول و عسکری قیادت کے درمیان مؤثر رابطوں اور ہم آہنگی کی ضروت پر زور دیتے ہوئے اپنے خطاب میں قومی سلامتی کی ضروریات، موجودہ اندرونی اور بیرونی چیلنجز اور علاقائی امن و قومی استحکام کیلیے مسلح افواج کے متحرک کردار سمیت مختلف امور پر روشنی دالی۔
سپہ سالار نے پاکستان کے اسٹریٹجک اور ترقیاتی مقاصد کو آگے بڑھانے کیلیے بین الادارہ جاتی ہم آہنگی، باہمی احترام اور مشترکہ قومی مقصد کی ضرورت پر زور دیا۔ انہوں نے شفاف اور مؤثر انداز میں ریاستی امور کار چلانے کیلیے سول بیوروکریسی کے ناگزیر کردار کو مزید اجاگر کیا۔
انہوں نے نوجوان افسران پر زور دیا کہ وہ اپنی ذمہ داریاں دیانتداری، پیشہ ورانہ مہارت اور جذبہ حب الوطنی کے ساتھ ادا کریں اور خدمت کے اعلیٰ ترین معیار کو اپنائیں۔
کورس کے شرکاء نے سینئر عسکری قیادت کے ساتھ رابطوں سمیت پاک فوج کی قیادت کے اسٹریٹجک وڑن، آپریشنل تیاری، قومی عزم اور ترقی میں ان کے کثیر جہتی تعاون کے بارے میں اپنی تجربات سے آگاہ کیا۔
اس موقع پر سوال و جواب کے تفصیلی سیشن بھی ہوا۔
