کراچی: ساتھی کے بھائی پر تشدد کے خلاف خواجہ سراؤں نے گلستان جوہر تھانے پر زبردست احتجاج کیا۔
تفصیلات کے مطابق گلستان جوہر پولیس اسٹیشن میں خواجہ سراؤں نے زبردست احتجاج کیا، مطالبات تسلیم کیے جانے پر انھوں نے اپنا احتجاج ختم کیا، جو کئی گھنٹے تک جاری رہا تھا۔
احتجاج اس وقت ختم کیا گیا جب تشدد کا نشانہ بننے والے خواجہ سرا کے بھائی کے علاج کی رقم ادا کی گئی۔
خواجہ سرا مظاہرین کا کہنا تھا کہ ایک خواجہ سرا کا بھائی ویلڈنگ کا کام کرتا تھا، جسے ایک دکاندار نے ساتھیوں کے ہمراہ تشدد کا نشانہ بنایا، 15 پر اطلاع پر پولیس پہنچی اور ایک شخص کو حراست میں لے کر تھانے منتقل کیا۔
پولیس نے خواجہ سراؤں کو ایف آئی آر درج کرنے اور مزید افراد کی گرفتاری کی یقین دہانی کرائی تھی، تاہم بعد ازاں پولیس کی جانب سے دونوں پارٹیوں میں صلح کرا دی گئی، اور زخمی شخص کے علاج معالجے کے اخراجات بھی ادا کر دیے گئے۔
خواجہ سراؤں کے کرکٹ میچ کی ویڈیو جھلکیاں
یاد رہے کہ گزشتہ ماہ 13 جون کو ایبٹ آباد میں شادی کی تقریب میں ایک افسوس ناک واقعہ پیش آیا تھا، جب رقص کے دوران ایک نوجوان پستول لے کر خواجہ سرا کے پاس آیا اور اسے گولی مار دی، اس واقعے کی ویڈیو بھی سوشل میڈیا پر وائرل ہوئی، مرنے والے خواجہ سرا کی شناخت زیبی ملک کے نام سے ہوئی تھی۔
ٹرانس جینڈر زیبی ملک کے قتل کے بعد کے پی میں گزشتہ ایک دہائی کے دوران قتل ہونے والے خواجہ سراؤں کی تعداد 154 ہو چکی ہے، یعنی ہر سال اوسطاً 15 سے زیادہ خواجہ سرا قتل ہوئے۔
