کراچی : حکومت سندھ نے یوم عاشور کی مناسبت سے دو روز کی عام تعطیل کا اعلان کردیا۔
تفصیلات کے مطابق حکومت سندھ نے عاشورہ کے موقع پر دو روز 5 جولائی اور 6 جولائی کو صوبے بھر میں عام تعطیل کا اعلان کردیا۔
یکم جولائی کو سروسز، جنرل ایڈمنسٹریشن اینڈ کوآرڈینیشن ڈیپارٹمنٹ کی جانب سے جاری کردہ ایک باضابطہ نوٹیفکیشن کے مطابق تعطیلات کا اطلاق تمام سرکاری دفاتر، خود مختار اور نیم خودمختار اداروں، کارپوریشنز اور حکومت سندھ کے انتظامی کنٹرول میں کام کرنے والی لوکل کونسلز پر ہوگا، تاہم ضروری خدمات جاری رہیں گی۔
اس بات کا اعلان چیف سیکریٹری سندھ آصف حیدر شاہ نے کیا اور اس پر عمل درآمد کے لیے تمام متعلقہ محکموں کو نوٹیفکیشن بھیج دیا گیا ہے۔
عاشورہ مسلمانوں کے لیے مذہبی اہمیت کا دن ہے، جسے کربلا کی جنگ میں پیغمبر اسلام صلی اللہ علیہ وسلم کے نواسے حضرت امام حسین (رضی اللہ عنہ) کی شہادت کی یاد میں منایا جاتا ہے۔
دو روز کے دوران سندھ بھر میں سیکیورٹی کے سخت انتظامات اور جلوس متوقع ہیں۔
کربلا اورعصرِ حاضر کے یزید
حکام نے عوام پر زور دیا ہے کہ وہ ان ایام کو سنجیدگی کے ساتھ منائیں اور امن و امان برقرار رکھنے کے لیے قانون نافذ کرنے والے اداروں کے ساتھ تعاون کریں۔
