پیٹرولیم مصنوعات کی قیمتوں میں اضافے کے بعد ریلوے نے بھی کرایوں میں اضافہ کردیا۔
محکمہ ریلوے نے ایک ماہ کے دوران دوسری بار مسافر، ایکسپریس اور میل ٹرینوں کے کرایوں میں اضافہ کیا ہے۔
پاکستان ریلوے نے ایکسپریس اور پسنجر ٹرینوں کے کرایوں میں 2 فیصد اضافہ کیا ہے جس کا نوٹیفکیشن بھی جاری کردیا گیا ہے۔
نوٹیفکیشن کے مطابق ٹرین کرایوں میں اضافے کا اطلاق 4 جولائی سے کیا جائے گا۔ ریلوے کرایوں کا اطلاق تمام مسافر، پسنجر، شٹل اور سیلونز گاڑیوں پر ہوگا۔
نوٹیفکیشن کے مطابق 2 فیصد کرایہ بڑھنے کا اطلاق ایڈوانس بکنگ پر بھی عائد ہوگا۔
ڈائریکٹر آئی ٹی اور ڈی ایس کو نئے کرایوں پر عملدرآمد کی ہدایات جاری کردی، ڈیزل مہنگا ہونے سے ریلوے کو ماہانہ 10 کروڑ 90 لاکھ روپے کا نقصان ہورہا تھا۔
واضح رہے کہ 18 جون کو مسافر ٹرینوں کے کرایوں میں تین فیصد اور مال بردار ٹرینوں کے کرایوں میں 4 فیصد اضافہ کیا گیا تھا۔
