کراچی کے علاقے اورنگی ٹاؤن میں داماد نے اپنے والد اور رشتہ داروں سے مل کر فائرنگ کرکے سسر سمیت تین افراد کو قتل کردیا۔
اے آر وائی نیوز کی رپورٹ کے مطابق اورنگی ٹاؤن کے علاقے مومن آباد چوک میں خاندانی جھگڑے کے دوران داماد نے فائرنگ کرکے اپنے سسر سمیت 3 افراد کو قتل کردیا۔
پولیس حکام کے مطابق جاں بحق افراد کی شناخت غوث الدین، گل بت خان اور امین کے نام سے ہوئی ہے، ویسٹ پولیس نے بروقت کارروائی کر کے 3 افراد کے قتل میں ملوث دو ملزمان کو حراست میں لے لیا۔
پولیس کے مطابق واقعے کے بعد مرکزی ملزم داماد کے والد سمیت دو ملزمان کو گرفتار کیا گیا ہے گرفتار ملزمان میں مقتول کی بیٹی کا سسر شاہجہاں اور رشتہ دار رحمت شامل ہیں جبکہ داماد فرار ہونے میں کامیاب ہوگیا۔
پولیس کا کہنا ہے کہ سسر کو قتل کرنے والے داماد کی تلاش کے لیے چھاپے مارے جا رہے ہیں۔ جائے وقوعہ سے نائن ایم ایم پستول اور دیگر اسلحہ پولیس نے تحویل میں لے لیا ہے، مزید شواہد اکھٹے کیے جارہے ہیں۔
پولیس حکام کا کہنا ہے کہ مقتول غوث الدین بیٹی کے گھر آیا تھا، تلخ کلامی کے بعد ہونے والی لڑائی کے دوران داماد اور رشتہ داروں نے فائرنگ کردی۔
مزید پڑھیں : سسرالیوں نے داماد کو گھر بلا کر زندہ جلا دیا
ایس ایس پی ویسٹ نے میڈیا کو بتایا کہ واقعے میں ملوث ملزم کے دیگر رشتہ داروں کی گرفتاری کیلئے بھی چھاپے جاری ہیں۔
