لاہور: بیدیاں میں انسدادِ دہشت گردی فورس کے دوسرے دستے کی پاسنگ آؤٹ پریڈ ہوئی، جس میں تئیس خواتین سمیت چار سوچوبیس اہلکاروں نے حصہ لیا۔
بیدیاں میں انسداددہشت گردی فورس کےدوسرے دستے کی پاسنگ آؤٹ پریڈ ہوئی، جس میں تربیت حاصل کرنے والے انسدادِ دہشت گردی فورس کے چارسو چوبیس جوانوں نے عملی مظاہرہ کیا۔
دستے میں تئیس خواتین اہلکار بھی مادر وطن کی حفاظت کیلئے کاندھے سے کاندھا ملائےشریک تھیں۔
ہراول دستے کامعائنہ تقریب کےمہمان خصوصی وزیراعلیٰ پنجاب شہبازشریف نے کیا اور اعلی کارکردگی پر اہلکاروں میں اعزازات اوراسناد تقسیم کی گئیں۔
لاہور میں انسدادِ دہشتگردی فورس کی پاسنگ آؤٹ پریڈ سے خطاب کرتے ہوئے وزیراعلٰی شہباز شریف کا کہنا تھا کہ پاکستان کو دہشتگردی کے جال میں پھنسا دیا گیا ہے، اس بات پر طیش آتا ہے کہ ہم نے کرنا کچھ اور تھا لیکن کسی اور کام میں پھنس گئے، یہ باتیں ماضی کا حصہ ہیں، جس پر افسوس نہیں، مایوسی کے اندھیرے ختم کرینگے۔
انہوں نے کہا کہ ترکی اور سری لنکا نے جس طرح دہشتگردی سے نمٹا ہے، اسی طرح پاکستان میں بھی دہشت گردی کا خاتمہ کرینگے، آج پاکستان کی سیاسی اور عسکری قیادت ایک صفحے پر ہے۔ وزیر داخلہ پنجاب کرنل ریٹائرڈ شجاع خانزادہ تقریب کے دوران شہباز شریف کو کبھی وزیرِاعظم اور کبھی چیف منسٹر آف پاکستان کہہ کر مخاطب کرتے رہے۔
