کراچی: ایم کیو ایم کے رہنما کنور نوید جمیل نے کہا ہے کہ اسٹیبلشمنٹ کی مکمل سپورٹ پاکستان تحریک انصاف کے ساتھ ہے ، اسٹیبلشمنٹ کی نظر میں ہم بیڈ بوائے اور تحریک انصاف گڈ بوائے ہے۔
نائن زیرو جناح گراؤنڈ میں بسنت میلے میں پریس کانفرنس کرتے ہوئے کنور نوید جمیل، وسیم اختر کا کہنا تھا کہ بدقسمتی سے تحریک انصاف کا رویہ شروع سے ہی جارحانہ ہے ، عمران خان ہر چینل پر الطاف حسین کے خلاف نازیبا زبان استعمال کرتے ہیں۔
انہوں نے کہا کہ پاکستان تحریک انصاف الیکشن لڑنے نہیں کراچی کو فتح کرنے آرہی ہے ، کنورنوید جمیل نے بتایا کہ حلقہ 246 میں دو ٹاؤنز ہیں جس میں لیاقت آباد سے ایک لاکھ بیس ہزار ار فیڈرل بی ایریا سے ایک لاکھ 45 ہزار ووٹ ہیں۔
انہوں نے کہا کہ پاکستان تحریک انصاف کا ایجنڈہ الیکشن لڑنا نہیں پیسے حاصل کرنا ہے ، کنور نوید جمیل کا کہنا تھا کہ تمام تر سرکاری مشینری اور سرکاری وسائل تحریک انصاف کیلئے وقف کردیے گئے ہیں۔
انہوں نے کہا کہ گذشتہ روز کے واقعے میں ایم کیو ایم کے کارکن نہیں عوام تھی جن پر اے ٹی سی کے مقدمات درج کیے گئے ، عمران خان اپنے کارکنوں کو چھڑالیتے ہیں مگر ان پر اے ٹی سی کے مقدمات قائم نہیں ہوتے۔
اس موقع پر وسیم اختر کاکہنا تھا کہ الیکشن کمیشن کو بتانا چاہتے ہیں کہ سندھ حکومت اپنے مطلب کیلئے ٹرانسفر کررہی ہے ، انتخابی شیڈول کے اعلان کے بعد ٹرانسفر اور پوسٹنگ پر پابندی ہوتی ہے۔
انہوں نے الیکشن کمیشن سے مطالبہ کیا کہ مہاجر وں اور الطاف حسین کے خلاف نازیبا الفاظ استعمال کرنے کا نوٹس لیا جائے ۔
