کراچی: پاکستان تحریک انصاف کے سربراہ عمران خان نے کریم آباد میں الیکشن کیمپ پر کارکنوں سے خطاب کرتے ہوئے کہا کہ 19 اپریل کو جلسہ ہوگا اور عوام کی اتنی بڑی تعداد ہوگی کہ جناح گراوٗنڈ چھوٹا پڑے گا۔
واضح رہے کہ اب سے کچھ دیر قبل پاکستان تحریکِ انصاف کے سربراہ عمران خان کی قیادت میں الیکشن ریلی عزیز آباد کے علاقے جناح گراوٗنڈ پہنچی تھی جہاں ایم کیو ایم کی رابطہ کمیٹی نے ریلی کے شرکاء کا استقبال کیا تھا۔
پاکستان تحریکِ انصاف کی ریلی کی جناح گراوٗنڈ آمد کے موقع پر ایم کیو ایم اور پی ٹی آئی کے کارکنان میں بد نظمی اورتصادم کی فضا پیدا ہوگئی اور ایک دوسرے کے خلاف ڈنڈوں کا آزادانہ استعمال کیا گیا۔
تصادم ہوتے ہی تحریکِ انصاف کے رہنماء عمران خان جناح گراوٗنڈ سے چلے گئے اورکریم آباد پرواقع الیکشن کیمپ پر پہنچ گئے جہاں انہوں نےکارکنوں سے خطاب کیا۔
انہوں اپنی جماعت کے کارکنوں سے خطاب کرتے ہوئے کہا کہ چاہے کچھ بھی ہوجائے تحریک ِ انصاف کے کارکن کسی سے لڑیں گے نہیں۔ انہوں نے پارٹی کے کارکنان کو ریلی کے انعقاد پر مبارک باد بھی دی۔
عمران خان نے ایم کیو ایم کے قائد الطاف حسین سے شکوہ کیا کہ یہ کیسا استقبال تھا ایک جانب استقبال کرتے ہیں دوسری جانب ڈنڈے برساتے ہیں۔
انہوں نے ایم کیو ایم کے قائد الطاف حسین اور رابطہ کمیٹی کا جناح گراوٗنڈ پہنچنے پر استقبال کرنے کے لئےشکریہ بھی ادا کیا۔
انہوں نے این اے 246 کے عوام کو مخاطب کرکے کہا کہ آپ لوگوں نے ڈرنا نہیں ہے ہم کراچی کو پھر سے روشنیوں کا شہر بنائیں گے یہاں عالمی سرمایہ کاری ہوگی۔
عمران خان نے 19 اپریل کو جلسے کا اعلان کرتے ہوئے این اے 246 میں پی ٹی آئی کے امیدوار عمران اسمعیل کو مخاطب کرکے کہا کہ کسی بڑی جگہ کا انتخاب کریں عوام کی کثرت کے باعث جگہ کم پڑنے والی ہے۔
