کراچی : جماعت اسلامی پاکستان کے امیر سراج الحق نے کہا ہے کہ الطاف حسین بھارت جاسکتے ہیں تو پاکستان کیوں نہیں آسکتے۔
انہوں نے کہا کہ ہم خواتین کو با اختیار بنانا چاہتے ہیں، ان خیالات کا اظہار انہوں نے عائشہ منزل پر خواتین کے ایک بڑے جلسہ عام سے خطاب کرتے ہوئے کیا۔
تفصیلات کے مطابق این اےدو سو چھیالیس میں جماعت اسلامی عائشہ منزل پر اپنی ویمن پاور کا مظاہرہ کر رہی ہے۔ اس موقع پر جلسہ عام سے خطاب کرتے ہوئے امیر جماعت اسلامی کا کہنا تھا کہ ہم خواتین کو جمہوری عمل شامل کر کے ان کا اصل مقام دلانا چاہتے ہیں جو انہیں شریعت آئین اور قانون نے دیا ہے۔
انہوں نے کہا کہ کراچی کی خواتین نے خوف کے بت کو پاش پاش کردیا۔اب یہاں سے دہشت گردی کی سیاست ختم ہونے والی ہے۔
ان کا کہنا تھا کہ کراچی کے فیصلے اب لندن میں نہیں ہونگے۔ ایم کیو ایم کے قائد الطاف حسین کو شدید تنقید کا نشانہ بناتے ہوئے ان کا کہنا تھا کہ الطاف حسین نے نو مرتبہ استعفیٰ دیا اور اب امید ہے کہ وہ 23 اپریل کو مستعفی ہوکر اپنا استعفیٰ واپس نہیں لیں گے۔
انہوں نے کہا کہ یہ الیکشن عوام کیلئے خوشحالی لیکر آئے گا، اور اس بار ایم کیو ایم کو ٹھپے لگانے کا موقع نہیں ملے گا۔
علاوہ ازیں جماعت اسلامی کراچی کے امیرحافظ نعیم الرحمٰن نے کہا ہے کہ این اے دو سو چھیالیس میں دھاندلی کا آغاز ہوگیا ہے اور پچیس ہزار جعلی ووٹرز کا اندراج ہوچکا ہے، الیکشن کمیشن اورحکومت سندھ ایم کیو ایم کو جتوانا چاہتےہیں۔
