اسلام آباد :اسلام آباد ہائیکورٹ نے سی ایس پی آفیسر کے بطور کمرشل کونسلر تعیناتی کے حکم نامے پر عملدرآمد نہ ہونے پروزیرِاعظم نوازشریف کو توہین عدالت کا نوٹس جاری کر دیا۔
سی ایس پی آفیسر چوہدری محمد اسلم کے بطورکمرشل کونسلر تعیناتی سے متعلق کیس کی سماعت جسٹس نورالحق قریشی نے کی، چوہدری محمد اسلم کے وکیل بیرسٹر افضل نے عدالت میں مؤقف اختیار کیا کہ عدالت نے نومبر دوہزار چودہ میں چوہدری محمد اسلم کو کمرشل کونسلر تعینات کرنے کے احکامات دیئے تھے مگر تاحال عدالتی حکم نامہ پرعمل نہیں ہو سکا۔
انھوں نےعدالت کو بتایا کہ وزیرِاعظم کے پرنسپل سیکرٹری کیجانب اعتراضا ت لگائے گئے ہیں، جس پر ہائیکورٹ نے آئندہ سماعت میں وزیر اعظم کے پرنسپل سیکریٹری کو عدالت میں ذاتی طور پر پیش ہونے کا حکم جاری کر دیا۔
سماعت کے دوران جسٹس نور الحق قریشی نے ریمارکس دیتے ہوئے کہا کہ وزیرِاعظم سیکرٹیریٹ میں کیا ہو رہا ہے وزیر اعظم کو بھی علم نہیں، ستائیس نومبر دو ہزار چودہ کے عدالتی حکم پر عمل درآمد نہیں کرایا گیا۔
