اسلام آباد : پیپلزپارٹی کے رہنما خورشید شاہ نےکہا ہے ہو سکتا ہے الطاف حسین گورنر سندھ کوغیر جانبدار ثابت کرنا چاہتے ہوں۔ ان خیالات کا اظہار انہوں نے اسلام آباد میں صحافیوں سے بات چیت کرتے ہوئے کیا۔
اپوزیشن لیڈر خورشید شاہ نے کہا کہ الطاف حسین کی گورنر سندھ سےناراضگی کی دو وجوہات ہوسکتی ہیں ۔ ہوسکتا ہے وہ گورنر سندھ سے سچ مچ ناراض ہوں یا پھر ضمنی انتخاب کے موقع پرگورنر کو غیر جانبدار ثابت کرنا چاہتے ہوں۔
واضح رہے کہ ایم کیو ایم کے قائد الطاف حسین نے گورنر سندھ ڈاکٹر عشرت العباد سے لاتعلقی کا اظہار کیا ہے، الطاف حسین کا کہنا ہے کہ گورنر سندھ ڈاکٹر عشرت العباد کا اب ایم کیوایم سے کوئی واسطہ نہیں رہا وہ ایم کیوایم کے نمائندے نہیں ہیں۔
الطاف حسین نے کہا گورنرسندھ کی موجودگی میں کارکنان کا ماورائے عدالت قتل کیا جاتا رہا، کارکنان کو گھروں سے گرفتار کیا جاتا رہا ہے۔
ان کے گھر بھی چھاپہ مارا گیا لیکن گورنرسندھ نے نہ کوئی مذمت کی اور نہ ہی قانون نافد کرنے والے اداروں کی کارروائی کا نوٹس لیا۔
ایم کیو ایم کے قائد نے کہا کہ گورنر سندھ وفاق اور اسٹیبلشمنٹ کے نمائندے ہیں، ایم کیوایم کے نہیں، میری نظر میں گورنرسندھ کی کوئی اب کوئی حیثیت نہیں۔
