سوات : سوات کی انسدادِ دہشتگردی کی خصوصی عدالت نے ملالہ پر حملے میں ملوث دس دہشتگردوں کو عمر قید کی سزا سنادی ہے۔
سوات کی گل مکئی پر حملے کرنے والے دہشتگرد انجام کو پہنچے، سوات کی انسدادِ دہشت گردی کی خصوصی عدالت میں ملالہ حملہ کیس کی سماعت ہوئی، عدالت نے الزام ثابت ہونے پر دس ملزمان کوعمر قید کی سزا سنادی۔
حملے میں ملوث ملزمان میں ظفر اقبال، اسرار رحمان، اظہار، ظفر علی، سلُیمان ،عرفان، شوکت، حضرت بلال، اکرام للہ اور عدنان شامل ہیں۔
یاد رہے کہ نو اکتوبر دو ہزار بارہ کو دہشتگردوں نےاسکول وین میں بیٹھی ملالہ پر قاتلانہ حملہ کیا تھا، حملے میں ملالہ یوسف زئی کو سر پر ایک گولی لگی تھی جبکہ ملالہ کی دو سہیلیاں شازیہ اور کائنات بھی زخمی ہوگئی تھیں۔
اس واقعے کی ایف آئی آر تھانہ سیدو شریف میں درج کی گئی تھی۔
Comments
- Advertisement -
