گلگت بلتستان: گلگت بلتستان کی تاریخ میں دوسرے عام انتخابات آج ہورہے ہیں، پولنگ کا عمل جاری ہے، چوبیس نشستوں کیلئے دوسواڑسٹھ امیدوارمدمقابل ہیں، پچھلے الیکشن کی فاتح پیپلزپارٹی کو کڑے امتحان کا سامنا ہے، ن لیگ اورپی ٹی آئی ٹف ٹائم دیں گی، پولنگ بوتھ کے باہر موجود فوجی افسران کو مجسٹریٹ کے اختیارات حاصل ہیں۔
چوبیس نشستوں کیلئے پی ٹی آئی نے بائیس ،مسلم لیگ ن نے چوبیس پیپلز پا رٹی نے بائیس ،مجلس وحدت المسلمین نے پندرہ، ایم کیو ایم نے نو ، جے یو آئی (ف) نے دس ، جنرل مشرف کی جماعت اے پی ایم ایل نے بارہ ، اسلامی تحریکِ پاکستان نے دس امیدواروں کو میدان میں اتارا ہے۔
گلگت ون میں چوبیس امیدوار میدان میں ہے، جہاں اہم مقابلہ ن لیگ کے میر جعفر اللہ اور پیپلزپارٹی کے امجد حسین کے درمیان ہیں، گلگت ٹو میں اصل جوڑ ن لیگ کے حافظ حفیظ الرحمان، پیپلزپارٹی کے جمیل احمد، تحریک انصاف کے فتح اللہ اور مجلس وحدت مسلمین کے مطاہرعباس کے درمیان پڑے گا۔
حلقہ چارہنزہ نگر ون میں اسلامی تحریک اور مجلس وحدت مسلمین کے امیدواروں کے درمیان کانٹے کا دنگل ہے۔
حلقہ پانچ ہنزہ نگر ٹو میں تحریکِ انصاف مرزا حسین اور لیگی امیدوارکلب علی کے درمیان مقابلہ ہے۔
حلقہ چھ ہنزہ نگر تین میں اصل مقابلہ ن لیگ کےمیرغضفر علی خان، پیپلزپارٹی کے ظفر اقبال کے درمیان ہے جبکہ عوامی ورکرز پارٹی کے باباجان کو بھی خاصی حمایت حاصل ہے۔
حلقہ نمبر سات سکردو ایک سے پیپلزپارٹی کے سید مہدی شاہ ،ن لیگ کے محمد اکبر تابان ، تحریک انصاف کے راجہ جلال حسین خان میں تگڑا مقابلہ ہوگا۔
حلقہ آٹھ اسکردو دو سے جماعت اسلامی کے سید محمد عباس رضوی مجلس وحدت المسلمین امتیازحیدر خان کے درمیان ہے ۔
حلقہ نمبر نو اسکردو تین میں لیگی امیدوار فدا محمد ناشاد اور ایم ڈبلیو ایم کے وزیر محمد سلیم کے درمیان جی بی ایل اے گیارہ سکردوپانچ میں پی ٹی آئی کے سید امجد زیدی اور ن لیگ کے اقبال حسن کے درمیان سخت مقابلے کا امکان ہے۔
منڈی بہاوالدین حلقہ این اے 108 میں ضمنی الیکشن کیلئے پولنگ کاآغاز ہو گیا ہے،پاکستان تحریک انصاف اور مسلم لیگ ن میں سخت مقابلہ متوقع ہے۔
گلگت الیکشن میں امن وامان یقینی بنانے کے لئے پاک فوج کو تعینات کیا گیا ہے، فوجی افسر کو دھاندلی یا امن وامان کی صورت حال سے متعلق کارروائی کے لئے مجسٹریٹ کا اختیار بھی ہوگا۔
گلگت بلتستان کے تمام اضلاع میں فوج تعینات ہے، پاک فوج کے اہلکار علاقے میں امن وامان کی صورتحال کو برقرار رکھنے کے لیے گشت بھی کررہے ہیں، دو سو سے زائد پولنگ اسٹیشنز کوحساس قرار دیا گیا جبکہ پولنگ اسٹیشن میں داخلے کے دوران چیکنگ کی جائےگی۔
پولنگ اسٹاف کے موبائل فون کے استعمال پر بھی پابندی ہوگی، انتخابی ضابطہ اخلاق کے مطابق اسلحے کی نمائش، ہوائی فائرنگ پربھی پابندی عائدلگائی گئی ہے، مظاہروں، متنازع نعروں اور لاؤڈ اسپیکر کاغیرقانونی استعمال ممنوع ہوگا، پابندی کا اطلاق بیس جون تک ہوگا۔
