کراچی: ملک بھر میں سحری کے دوران بجلی کی آنکھ مچولی کا سلسلہ جاری رہی، بجلی کی عدم فراہمی پر شہری بھی سراپا احتجاج ہیں۔
رمضان المبارک کا آغاز ہوتے ہی لوڈشیڈنگ کا جن بے قابو ہوگیا، مختلف شہروں میں بجلی کی عدم فراہمی کا سلسلہ کئی گھنٹوں پر محیط ہوگیا، شہریوں کے احتجاج کی سُنوائی نہ ہونے پر بجلی فراہم کرنے والے اداروں کا عملہ زیرِ عتاب ہے۔
کراچی کے کئی علاقے بجلی سے محروم ہیں جبکہ بعض علاقوں میں بجلی چوبیس گھنٹے سے غائب ہے، سرجانی، شاہ فیصل کالونی، منظور کالونی، بلدیہ ٹاؤن، کیماڑی، مسان روڈ، سکندر آباد اور نارتھ ناظم آباد سمیت کئی علاقوں میں بجلی کی آنکھ مچولی جاری ہے۔
نارتھ ناظم آباد میں شہریوں نے بجلی کی عدم فراہمی پر احتجاج کے دوران الیکٹرک کے عملے کی دھلائی بھی کردی، اس دوران کے الیکٹرک کے ترجمان کا بیان بھی سامنے آیا کہ بجلی کی غیرعلانیہ لوڈشیڈنگ کا مسئلہ حل کر دیا گیا ہے۔
لاہور میں کئی علاقوں میں بجلی غائب ہے جبکہ مساجد کے لاؤڈ اسپیکر پانی و بجلی کی عدم فراہمی پر شہریوں کو احتجاج پر بلانے کے لیے بھی استعمال کیے گئے، ڈسکہ، ملتان، گجرات اور جڑواں شہروں سمیت کئی شہروں میں انتظامیہ لوڈشیڈنگ کے جن پر قابو پانے میں ناکام ہے۔
