کراچی کنگز گزشتہ روز کوئٹہ گلیڈیئٹرز سے سنسنی خیز مقابلے کے بعد میچ ہار گئی ایک کیچ نے سارے میچ کا نقشہ بدل کر رکھ دیا۔
اے آر وائی نیوز کے مطابق ایچ بی ایل پاکستان سپر لیگ کے سنسنی خیز مقابلے جاری ہیں۔ گزشتہ روز کراچی کنگز اور کوئٹہ گلیڈیئٹرز کے درمیان میچ کھیلا گیا۔ یہ میچ بھی دیگر میچوں کی طرح سنسنی خیز رہا۔ کراچی کنگز اس بار بھی فتح کے بالکل قریب آگئی لیکن کامیابی اپنے نام نہ کر سکی اور صرف ایک کیچ نے پورے میچ کا نقشہ ہی بدل ڈالا۔
کوئٹہ گلیڈیئٹرز نے پہلے کھیلتے ہوئے مقررہ 20 اوورز میں 7 وکٹوں کے نقصان پر 168 رنز بنائے۔ اننگ کی خاص بات مارٹن گپٹل کے 67 گیندوں پر جارحانہ 117 رنز کی اننگ تھی۔ کراچی کنگز کے شعیب ملک کی شاندار نصف سنچری کے باوجود ہدف سے 7 رنز پیچھے رہ گئی یوں کوئٹہ گلیڈیئٹرز نے 6 رنزسے فتح اپنے نام کی۔ اگر اہم موقع پر شرجیل خان مارٹن گپٹل کا کیچ ڈراپ نہ کرتے تو میچ کا نتیجہ اس کے برعکس بھی ہوسکتا تھا۔
یہ بھی پڑھیں: شعیب ملک کی نصف سنچری رائیگاں، کوئٹہ نے کراچی کو شکست دے دی
مارٹن گپٹل جب 61 کے انفرادی اسکور پر تھے جب کنگز کے شرجیل خان نے ان کا کیچ ڈراپ کر دیا۔ اس موقع سے گپٹل نے بھرپور فائدہ اٹھایا اور پھر پیچھے مڑ کر نہ دیکھا۔ دھواں دھار انداز میں طوفانی سنچری داغ کر اپنی ٹیم کی فتح میں اہم کردار نبھایا۔
شاید اسی لیے یہ مقولہ بہت مشہور ہے کہ ’’کیچ ون دی میچ‘‘
