کراچی: صدر مملکت ڈاکٹر عارف علوی سے علماء کے وفد نے گورنر ہاؤس میں ملاقات کی ہے۔
تفصیلات کے مطابق گورنر ہاؤس کراچی میں مفتی منیب الرحمان کی قیادت میں علماء کے وفد نے صدرِ پاکستان ڈاکٹر عارف علوی سے ملاقات کی۔
اس موقع پر ڈاکٹر عارف علوی کا کہنا تھا کہ علمائے کرام ماں اور بچے کی صحت کے حوالے سے عوام میں آگہی پیدا کرنے میں اپنا کردار ادا کریں۔
صدر مملکت نے کہا کہ علماء اسلامی تعلیمات کے مطابق وراثت میں خواتین کے حقوق پر لوگوں میں بیداری پیدا کریں۔
علماء نے کورونا وبا کے دوران مساجد کو ایس او پیز کے مطابق کھلا رکھنے پر صدر مملکت ڈاکٹر عارف علوی کے کردار کی تعریف کرتے ہوئے بین المذاہب ہم آہنگی پیدا کرنے اور تمام مکتبہ فکر کو اہم معاملات بشمول کووڈ-19 میں اعتماد میں لینے پر ان کے کردار کو سراہا۔
صدر پاکستان نے سابق ناظم کراچی مرحوم نعمت اللہ خان کے گھر جا کر مرحوم کے درجات کی بلندی کے لیے فاتحہ خوانی کی اور لواحقین سے ان کی وفات پر گہرے رنج وغم کا اظہار کیا۔