فیصل آباد: صوبہ پنجاب کے شہر فیصل آباد میں بھیڑیا گھر میں رکھنے والے شہری کو دس ہزار روپے جرمانہ عائد کر دیا گیا۔
تفصیلات کے مطابق فیصل آباد میں گھر میں بھیڑیا رکھنے والے شہری کو 10 ہزار روپے جرمانہ عائد کرنے کے ساتھ سول جج گلزار نے بھیڑیا محکمہ وائلڈ لائف کے حوالے کرنے کا حکم دے دیا۔
وائلڈ لائف حکام کے مطابق واپڈا ٹاؤن میں شہری نے بھیڑیا پالا۔حکام کا کہنا ہے کہ تحویل میں لیا گیا بھیڑیا کمالیہ پارک میں چھوڑا جائے گا۔
اس سے قبل گزشتہ ہفتے 5 اگست کو گلگت بلتستان میں برفانی چیتے کے غیر قانونی شکار کرنے پر وائلڈ لائف کی عدالت نے دو ملزمان کو دو سال قید اور 50 لاکھ جرمانے جبکہ 2 کو ایک ایک سال اور ایک کو 1 ماہ قید کی سزا سنائی تھی۔
یاد رہے کہ گلگت بلتستان میں پولیس نے برفانی چیتے کا غیر قانونی شکار کرنے والے پانچ ملزمان کو گرفتار کیا تھا۔
