سلوواکیہ میں فلائنگ کار کی کامیاب آزمائشی پرواز کے بعد کیلی فورنیا میں دنیا کی پہلی اڑنے والی فلائنگ موٹر سائیکل کو آخری آزمائش درکار ہے جس کے بعد یہ حقیقت کا روپ دھار لے گی۔

فلائنگ موٹر سائیکل کے خالق ڈیوڈ میمان ایک پرجوش ہواباز ہیں، وہ لاس اینجلس میں قائم جیٹ پیک ایوی ایشن (ورٹیکل ٹیک آف اینڈ لینڈنگ) ایئر کرافٹ مینوفیکچرنگ ادارے کے بانی اور سی ای او ہیں۔

پہلی فلائنگ موٹر سائیکل جسے اسپیڈ اسٹار کا نام دیا گیا ہے، اس کی ایڈورٹائزنگ شروع کردی گئی ہے، ان کی کمپنی کا کارنامہ ہے کہ انہوں نے دنیا کی پہلی پورٹیبل جیٹ پیک کو کامیابی سے بنایا ہے۔

دی اسپیڈر کی قیمت تین لاکھ 80 ہزار ڈالر یعنی پانچ کروڑ پاکستانی روپے کے برابر ہے یہ دورانِ پرواز ازخود سیدھا ہوتا ہے جس کے لیے اسٹیبلائزر اور جائرواسکوپ ٹیکنالوجی استعمال کی گئی ہے۔

یہ موٹرسائیکل جیٹ ٹربائن انجن کی بدولت اڑتی ہے اور زیادہ سے زیادہ 150 میل فی گھنٹہ کی رفتار تک جاپہنچتی ہے۔ دی اسپیڈر مسلسل 20 منٹ تک 15 ہزار فٹ کی بلندی پر محو پرواز رہ سکتی ہے۔