ایلون مسک نے گزشتہ روز ٹوئٹر پر صارفین سے ٹوئٹر کی سربراہی چھوڑنے سے متعلق رائے مانگی تھی جس پر 57 فیصد سے زائد نے ہاں میں جواب دیا ہے۔
ایلون مسک سماجی رابطوں کی سب سے مقبول ویب سائٹ ٹوئٹر کی ملکیت سنبھالنے کے بعد سے ہی خبروں میں ہیں۔ آتے ہی پہلے انہوں نے درجنوں افراد کو نوکریوں سے فارغ کیا۔ پھر بلو ٹک اکاؤنٹ ہولڈرز سے فیس وصولی سے متعلق خبریں سامنے آتی رہیں اور گزشتہ روز انہوں نے ٹوئٹر صارفین سے سوال کرلیا کہ کیا وہ ٹوئٹر کی سربراہی چھوڑ دیں۔
ایلون مسک کے اس سوال پر ٹوئٹر صارفین کی اکثریت نے پول میں اپنی مثبت رائے کا اظہار کیا اور 57 فیصد سے زائد صارفین نے کہا کہ ہاں وہ ٹوئٹر کی سربراہی چھوڑی دیں۔
انھوں نے کہا کہ وہ پول کے نتائج کی پابندی کریں گے اور صارفین جو بھی فیصلہ کریں گے انھیں قبول ہوگا۔
Should I step down as head of Twitter? I will abide by the results of this poll.
— Elon Musk (@elonmusk) December 18, 2022
عوامی پول میں اکثریت کی جانب سے اس رائے کا اظہار کیے جانے کے بعد اب دیکھنا یہ ہے کہ ایلون مسک صارفین کی رائے کا احترام کرتے ہوئے ٹوئٹر کی قیادت سے دستبردار ہوتے ہیں یا نہیں۔
واضح رہے ایلون مسک کے ٹوئٹر کے سربراہ بننے کے بعد سے صارفین پہلے ہی ان کی پالیسی سے کافی نالاں ہیں۔
