امریکا کے ہونہار طالب علم نے سینڈ باکس ویڈیو گیم مائن کرافٹ کے ذریعے ایک پوری یونیورسٹی کی عمارت ہی کھڑی کردی ہے۔
یہ طالبعلم ساؤتھ ڈکوٹا اسکول آف مائنز اینڈ ٹیکنالوجی کا طالبعلم جیکسن چینیے ہے جس نے بڑی جانفشانی سے یہ کام انجام دیا ہے اور مائن کرافٹ پر بنائی گئی یونیورسٹی کے کیمپس میں تمام عمارتوں اور تفیصلات کو بھی ڈیزائن کیا ہے۔
کمپیوٹر انجینیئرنگ کے طالبعلم جیکسن نے حیران کن تفصیلات پر مبنی کمپیوٹر ماڈل بنایا ہے۔ ان کے پراجیکٹ میں یونیورسٹی کی عمارت کی جزیات پر بھی توجہ دی ہے اور تجربہ گاہیں، دفاتر، کتابیں اور فرنیچر وغیرہ کو بھی اس شامل کیا ہے۔
جیکسن کا کہنا ہے کہ مائن کرافٹ کوئی عام نہیں بلکہ ایک غیرمعمولی گیم ہے اور وہ یہ گیم بچپن سے کھیل رہے ہیں۔
ان کا خیال ہے کہ نئے طلبہ و طالبات کے لیے یہ ایک بہترین مددگار ثابت ہوسکتا ہے کیونکہ اس طرح وہ پوری جامعہ اور اس کے ایک ایک گوشے کی تفصیل معلوم کرسکتے ہیں۔ اس طرح مائن کرافٹ کیمپس سے انہیں ایک سے دوسری جگہ پہنچنے میں بہت آسانی ہوگی۔
دلچسپ بات یہ ہے کہ مائن کرافٹ میں بنایا گیا یہ ڈیزائن اوپن سورس کی طرح جسے طلبا و طالبات استعمال کرکے اس میں اپنی معلومات اور تفاصیل شامل کرسکتے ہیں۔
