کوئٹہ : مری اتحاد کے چیئرمین جہانگیر مری نے خدشہ ظاہر کیا ہے کہ سردارعبدالرحمان کھیتران کو بیرون ملک سے فرار کرادیا جائے گا۔
یہ بات انہوں نے اے آر وائی نیوز سے خصوصی گفتگو کرتے ہوئے کہی، انہوں نے کہا کہ یہ اطلاعات ملی ہیں کہ سردارکھیتران کو سرکاری طیارے میں دبئی بھیجنے کی تیاری ہورہی ہے۔
جہانگیرمری کا کہنا تھا کہ سردار کھیتران کے سیکورٹی گارڈ کے کمروں پر چھاپہ مار کرڈرامہ رچایا گیا، اگر عبدالرحمان کھتران کو بیرون ملک بھیجا گیا اور ہمیں انصاف نہ ملا تو پورے ملک میں دھرنے دیے جائیں گے۔
سانحہ بارکھان کے حوالے سے جرگہ طلب
علاوہ ازیں سانحہ بارکھان کے حوالے سے خان آف قلات کے بھائی پرنس عمر احمد زئی نے قبائلی جرگہ طلب کرلیا ہے، یہ جرگہ آج شام 5بجے ایوان قلات میں منعقد ہوگا۔
ذرائع کے مطابق جرگہ میں پشتون بلوچ قبائلی سربراہان کو شرکت کی دعوت دے دی گئی، جرگہ میں قبائلی روایات کے تحت واقعے کا جائزہ لے کر آئندہ کے لائحہ عمل کیلئے مشاورت کی جائے گی۔
مزید پڑھیں : کوئٹہ میں صوبائی وزیر عبدالرحمان کھیتران کے گھر پر چھاپہ
واضح رہے کہ کچھ دیر قبل پولیس نے مغوی بچوں کی بازیابی کیلئے پٹیل باغ میں صوبائی وزیر عبدالرحمان کھیتران کے گھر چھاپہ مارا تھا اس دوران صوبائی وزیر کے مہمان خانے سمیت گھر کے مختلف حصوں کی تلاشی لی گئی۔
