ورلڈکپ میں سری لنکا کے خلاف ہدف کا تعاقب کرتے ہوئے شاندار سنچری اسکور کرنے والے عبداللہ شفیق نے کبھی خود کو مخاطب کرتے ہوئے ایک عہد کیا تھا جسے انھوں نے سچ کردکھایا۔
قومی اوپنر نے تین سال قبل ایک پوسٹ کی تھی اور اس میں خود کے بارے میں کیا کہا تھا یہ جاننا یقیناً شائقین کے لیے حیران کن ہوگا۔ انھوں نے اپنے حوالے سے جو کہا تھا اسے سری لنکا کے خلاف میچ زبردست کارکردگی سے صحیح ثابت کردیا۔
پاکستانی اوپنر نے 21 جولائی 2020 کو سوشل میڈیا پر تحریر کیا تھا کہ ’ڈیئر می! انشااللہ ایک دن میں خود کو اپنے اوپر فخر محسوس کرواؤں گا‘۔ عالمی کپ ڈیبیو میں بہترین اننگز پر ان کی پوسٹ وائرل ہوگئی۔
کرکٹر نے اپنی ایک تصویر کے ساتھ پوسٹ کو شیئر کیا تھا جس میں وہ کاندھے پر بیگ اٹھائے کھڑے ہیں۔
عبداللہ شفیق کی شاندار کارکردگی پر نہ صرف پاکستانیوں بلکہ بھارتی تجزیہ کاروں اور سابق کرکٹرز نے بھی کھل کر تعریف کی۔
اب میچ کے بعد سوشل میڈیا پر کرکٹر کی جانب سے 3 سال قبل کی گئی ایک پوسٹ وائرل ہوچکی ہے، اس پوسٹ کو ایکس، انسٹاگرام اور فیس بک کے کئی میمز اور دیگر پیجز نے شیئر کیا ہے۔
واضح رہے کہ آئی لینڈرز کے خلاف میچ میں عبداللہ شفیق نے 103 گیندوں پر 113 بنائے اور 345 رنز کے ہدف کو عبور کرنے کے لیے جیت کی بنیاد رکھی تھی۔
