اسلام آباد : احتساب عدالت نے مسلم لیگ ن کے قائد نواز شریف کے صاحبزادوں کے دائمی وارنٹ معطلی کی درخواست پر فیصلہ محفوظ کرلیا ، فیصلہ 2 بجے سنایا جائے گا۔.
تفصیلات کے مطابق احتساب عدالت میں مسلم لیگ ن کے قائد نواز شریف کے صاحبزادوں کی دائمی وارنٹ گرفتاری معطلی کیلئے درخواستوں پر سماعت ہوئی، احتساب عدالت کے جج ناصرجاوید رانا نے سماعت کی۔
حسین نواز اور حسن نواز کے وکیل قاضی مصباح احتساب عدالت میں پیش ہوئے ، وکیل قاضی مصباح نے بتایا کہ ایون فیلڈ ریفرنس میں 5ملزمان تھے 3 کو سزا ہو گئی تھی ،حسین نواز اور حسن نواز کے عدالت حاضر نہ ہونے کے باعث دائمی وارنٹ جاری ہوئے تھے۔
وکیل کا کہنا تھا کہ ہائیکورٹ سے ملزمان بری ہوگئے تھے، حسین نواز اور حسن نواز 12مارچ کو پاکستان آنا چاہتے ہیں، حسین نوازاورحسن نوازکے دائمی وارنٹ معطل کیے جائیں ، دونوں عدالت کے سامنے پیش ہو جائیں گے۔
جس پر نیب حکام نے کہا کہ ملزمان عدالت کے سامنے پیش ہونا چاہتے ہیں تو عدالت موقع دے سکتی ہے ،ناقابل ضمانت اور دائمی وارنٹس کا مقصد ہوتا ہے کہ ملزم عدالت کے سامنے پیش ہو۔
احتساب عدالت بنے حسین نواز اور حسن نواز کے دائمی وارنٹ معطلی کی درخواست پر فیصلہ محفوظ کرلیا، عدالت وارنٹ معطلی پر محفوظ فیصلہ 2 بجے سنائے گی۔
یاد رہے حسین نواز اور حسن نواز نے وارنٹ گرفتاری کی معطلی کیلئے عدالت سے رجوع کیا تھا، ایون فیلڈ،فلیگ شپ اور العزیزیہ ریفرنسز میں وارنٹ معطلی کی درخواستیں دائر کی گئیں تھیں۔
