کراچی : اورنگی ٹاون میں 7 سالہ لائبہ سے زیادتی کرنے والے درندے کو گرفتار کرلیا گیا، ملزم نے دوران تفتیش اعتراف جرم کرلیا ہے۔
تفصیلات کے مطابق کراچی کے علاقے اورنگی ٹاون میں 7 سالہ لائبہ سے جنسی زیادتی کے کیس میں پیش رفت ہوئی۔
پاکستان بازارپولیس نے بچی کو زیادتی کا نشانہ بنانے والے ملزم کو گرفتار کرلیا، ایس ایس پی ویسٹ حفیظ الرحمان بگٹی نے بتایا کہ واقعہ کا زیادتی کا واقعہ 7 مئی کو پیش آیا،بچی کئی روز زیر علاج رہی اور پولیس نے مقدمہ درج کرکے متعدد افراد سے تفتیش کی۔
ان کا کہنا تھا کہ وزیر داخلہ سندھ ضیاء الحسن لنجار نے سخت نوٹس لیا تھا جس کے بعد پولیس نے ہیومن انٹیلیجنس کی مدد سے ملزم فرحان کو گرفتار کیا۔
حفیظ الرحمان نے انکشاف کیا کہ مئی کو اورنگی ٹاون پاکستان بازار میں 7سالہ بچی سے زیادتی میں پڑوسی ملوث نکلا۔
ایس ایس پی ویسٹ کا کہنا تھا کہ ملزم فرحان کو واقعاتی شواہد کی مدد سے گرفتار کیا گیا، ملزم نے دوران تفتیش اعتراف جرم بھی کیا ہے۔
انھوں نے مزید بتایا کہ تفتیش میں کچھ سی سی ٹی وی فوٹیج سامنےآئی ہیں، جس خالی پلاٹ میں بچی کو زیادتی کا نشانہ بنایا گیا وہاں سے ڈی این اے سیمپلزبھی حاصل کرلئے ہیں۔
ملزم کا سابقہ کریمنل ریکارڈ چیک کیا جارہا ہے اور مزید قانونی کارروائی کیلئے تفتیشی حکام کے حوالے کردیا گیا ہے۔
