بالی ووڈ کی متنازع فلم دی کیرالہ اسٹوری کی اداکارہ ادا شرما کا فون نمبر سوشل میڈیا پر لیک ہوگیا۔
بھارتی میڈیا رپورٹس کے مطابق ’دی کیرالہ سٹوری‘ اداکار کو اس وقت پریشانی کا سامنا ہے کیونکہ ان کا موبائل نمبر جان بوجھ کر سوشل میڈیا پر لیک کیا گیا ہے اور فلم کی وجہ سے انہیں دھمکی آمیز کالز اور پیغامات موصول ہو رہے ہیں۔
اداکارہ نے میڈیا سے گفتگو کرتے ہوئے کہا کہ میرا نمبر لیک کرنا اس شخص کی ذہنیت کو ظاہر کرتا ہے جو اتنا نیچے گر گیا اور ایسا کرنے میں اسے خوشی مل رہی ہے۔
انہوں نے کہا کہ یہ مجھے کیرالہ کی کہانی میں ایک منظر کی یاد دلاتا ہے جہاں ایک لڑکی کا نمبر شائع کرکے اسے برا بھلا کہا جاتا ہے۔
ادا شرما نے کہا کہ وہ فی الحال اپنا نمبر تبدیل کرنے کا ارادہ رکھتی ہیں۔
اداکارہ نے کہا کہ جس شخص نے نمبر لیک کیا وہ طویل عرصے سے کچھ دوسری سرگرمیوں میں بھی مصروف ہے جس کا پولیس کو پتا چلا ہے تاہم مجھے اپنا نمبر تبدیل کرنا پڑرہا ہے
۔
واضح رہے کہ دی کیرالہ اسٹوری کی کہانی ہندوستانی ریاست سے تعلق رکھنے والی خواتین کے گرد گھومتی ہے جنہیں مبینہ طور پر اسلام قبول کرنے کے لیے لالچ دیا جاتا ہے اور پھر انہیں عسکریت پسند گروپ میں شامل کیا جاتا ہے۔
