اسلام آباد : ایڈمرل نوید اشرف پاک بحریہ کے تئیسویں چیف بن گئے، سبکدوش ہونے والے نیول چیف ایڈمرل محمدامجد خان نیازی نے پاک بحریہ کی کمان نئے ایڈمرل چیف نوید اشرف کو سونپی۔
تفصیلات کے مطابق پی این ایس ظفر اسلام آباد میں پاک بحریہ میں تبدیلی کمان کی پُروقار تقریب ہوئی، جس میں سبکدوش نیول چیف ایڈمرل امجد نیازی کو گارڈ آف آنر دیا گیا۔
تقریب میں سبکدوش ہونے والے نیول چیف ایڈمرل محمدامجد خان نیازی نے پاک بحریہ کی کمان نئے ایڈمرل چیف نوید اشرف کے حوالے کی۔
پاک بحریہ کے نئے سربراہ نویداشرف کو پاکستان نیوی میں غیرمعمولی پیشہ وارانہ خدمات اور بہادری کےاعتراف میں ہلالِ امتیازملٹری اورتمغہ بسالت سےنوازا جاچکا ہے۔
امیرالبحر ایڈمرل نوید اشرف نے 1989 میں پاک بحریہ کی آپریشنز برانچ میں کمیشن حاصل کیا، جرمنی اور پاکستان میں ابتدائی بحری تربیت کی کامیاب تکمیل پرانہیں قائداعظم گولڈ میڈل سے نوازا گیا اوع اپنے شاندار نیول کیریئر کے دوران انہوں نے متعدد کمانڈ اور اسٹاف تقرریوں پر خدمات انجام دیں۔
ان کے 10 سالہ کمانڈز تجربے میں گن بوٹ کی کمانڈ، ایک مائن ہنٹر، تین ڈسٹرائرز اور 25ویں اور 18ویں ڈسٹرائر اسکواڈرنز کی کمانڈزشامل ہیں۔
ایڈمرل نوید اشرف کو پاکستان نیول اکیڈمی اور پاکستان نیوی فلیٹ کی کمانڈ کرنے کا اعزازبھی حاصل ہے، ان کی اہم ا سٹاف تقرریوں میں فلیٹ ہیڈ کوارٹر میں فلیٹ آپریشنز آفیسر، ہیڈکوارٹر فلیگ آفیسر سی ٹریننگ میں کیپٹن ٹریننگ، ہیڈکوارٹر NAVCENT بحرین میں ٹاسک فورس 151کے چیف اسٹاف آفیسر، وائس پریزیڈنٹ نیشنل ڈیفنس یونیورسٹی، نیول سیکرٹری، ڈپٹی چیف آف نیول اسٹاف(ایڈمن)، ڈائریکٹر جنرل C4I شامل ہیں۔
اس کے علاوہ ڈپٹی چیف آف نیول اسٹاف (ٹریننگ اینڈ پرسنیل)، ڈپٹی چیف آف نیول اسٹاف (آپریشنز) اور نیول ہیڈ کوارٹرز میں چیف آف اسٹاف کی اہم تعیناتیاں
بھی شامل ہیں۔
