کابل : افغان وزیر خارجہ نے بلاول بھٹو کو پاکستانی سفارتخانے پر حملے میں ملوث ذمہ داران کے خلاف کارروائی کی یقین دہانی کرادی ۔
تفصیلات کے مطابق پاکستانی سفارتخانے پر حملے کے بعد افغانستان کے وزیر خارجہ نے وزیر خارجہ بلاول بھٹو زرداری سے ٹیلیفونک رابطہ کیا۔
افغان وزیر خارجہ نے پاکستانی ناظم الامور پر حملے کی مذمت کی اور افسوس کا اظہار کرتے ہوئے کہا پاکستانی سفارت خانے اور عملے کی حفاظت پر خصوصی توجہ دی جائےگی۔
افغان وزیرخارجہ نے بلاول بھٹو کو یقین دہانی کرائی کہ واقعہ میں ملوث لوگوں کو گرفتار کرکے قانونی کارروائی کی جائےگی۔
بلاول بھٹوزرداری کا کہنا تھا کہ ایسے واقعات دونوں ممالک کےتعلقات کومتاثرنہیں کرسکتے،ب کسی کوبھی اپنےمذموم مقاصدکی تکمیل کی اجازت نہیں دی جائے گی۔
گذشتہ روز افغانستان کے دارالحکومت کابل میں پاکستانی ناظم الامور کو نشانہ بنایا گیا، فائرنگ سے سپاہی اسرار محمد زخمی ہوگیا تھا۔
پاکستانی سفارتی حکام پر اس وقت فائرنگ کی گئی جب ناظم الامور عبید الرحمان نظامانی چہل قدمی کررہے تھے۔
