اسلام آباد: افغان صدر اشرف غنی دو روزہ دورے پر آج پاکستان پہنچ رہے ہیں، دورے میں وہ صدر ڈاکٹرعارف الرحمان علوی اور وزیراعظم عمران خان سے ملاقات کریں گے۔
تفصیلات کے مطابق افغان صدر لاہور کا دورہ بھی کریں گے جہاں ایک بزنس فورم سے خطاب کریں گے فورم میں پاکستان اور افغانستان کی کاروباری شخصیات شرکت کری گے۔
یہ افغان صدر کا اسلام آباد کا تیسرا دورہ ہے، وزیراعظم عمران خان اور افغان صدر کے درمیان ایک غیررسمی ملاقات رمضان المبارک میں مکہ میں ہونے والی اسلامی تعاون تنظیم کے سربراہ اجلاس میں ہوئی تھی۔
پاکستان اور افغانستان کے درمیان تعلقات کافی عرصے سے کشیدہ ہیں ۔ جس کی وجہ افغانستان سے پاکستان میں ہونے والے دہشت گرد حملے ہیں۔
پاکستان سے بھاگے ہوئے کئی دہشت گرد اس وقت افغانستان میں پناہ لئے ہوئے ہیں، اسلام آباد کئی بار ان کے خلاف کارروائی کا مطالبہ کرچکا ہے، مگر کابل نے اس پر کوئی بات کرنے کو تیار نہیں ہے۔
پاکستان افغان سرحد کے ساتھ باڑ بھی لگارہا ہے جس پر افغان فورسز کی جانب سے مزاحمت کی جارہی ہے اور اسے روکنے کے لئے کئی بار حملے بھی کئے جس میں پاک فوج کے کئی جوان شہید ہوچکے ہیں۔
امریکا اور طالبان کو مذاکرات کی میز پر لانے میں بھی پاکستان کا اہم کردار رہا ہے، دونوں فریقین میں تمام بات چیت قطر کے دارالحکومت دوحہ میں ہوئے ہیں اور اگر مزید مذاکرات ہوئے تو وہ بھی قطر میں ہی ہوں گے۔
امیر قطر شیخ تمیم بن حمد الثانی تین روز قبل ہی پاکستان کا دورہ کرکے واپس گئے ہیں، ان کے فورا بعد اب افغان صدر اشرف غنی اسلام آباد آرہے ہیں، اس لئے اس دورے کی اہمیت مزید بڑھ جاتی ہے۔
