اسلام آباد : افغان طالبان وفد ملاعبدالغنی کی قیادت میں آج وزیر خارجہ شاہ محمود قریشی سے ملاقات کرے گا، ملاقات میں وزیر خارجہ کو امریکہ سے معاہدے پر عملدرآمد کی صورتحال سے آگاہ کیا جائے گا۔
تفصیلات کے مطابق افغان طالبان وفدملاعبدالغنی کی قیادت میں آج شام وزارت خارجہ پہنچے گا، جہاں وفد وزارت خارجہ میں وزیر خارجہ شاہ محمود قریشی سے ملاقات کرے گا۔
وفد وزیر خارجہ کوامریکہ سےمعاہدے پر عملدرآمد کی صورتحال سےآگاہ کرے گا ، دوران ملاقات بین الافغان مذاکرات کے جلد انعقاد پر بھی بات چیت ہوگی۔
گذشتہ روز افغان طالبان کا وفد ملاعبدالغنی برادر کی قیادت میں دوحہ سے پاکستان پہنچا تھا، افغان طالبان کے وفد کو وزیرخارجہ شاہ محمود قریشی نے دورہ پاکستان کی دعوت دی تھی۔
واضح رہے کہ امریکا، طالبان اور افغان حکومت کے درمیان معاہدے کے تحت افغانستان میں معاملات تیزی سے امن کی جانب بڑھ رہے ہیں، افغانستان کی حکومت اور طالبان کے درمیان عیدالاضحیٰ کے موقع پر جنگ بندی کا اعلان کیا گیا تھا جس کے بعد 1500 قیدیوں کو رہا کیا گیا۔
گزشتہ ماہ افغان طالبان نے ’افغان امن معاہدے‘ کے تحت اور اپنے وعدے کے مطابق ایک ہزار سرکاری قیدیوں کو رہا کیا تھا۔
طالبان کے ترجمان کی جانب سے جاری بیان میں کہا گیا تھا کہ ’قیدیوں کی رہائی کا مقصد افغانستان کے مسائل کو پر امن طریقے سے حل کرنا ہے جس کے لیے ہم ہر وقت تیار ہیں‘۔
رواں ماہ 14 تاریخ کو افغانستان کی حکومت نے ملک میں مستقل قیام امن کے لیے اپنی قید میں موجود آخری 400 طالبان جنگ جوؤں کو بھی پُل چرخی جیل سے رہا کر دیا ہے، افغان حکومت کے اس عمل کے بعد طویل عرصے سے تعطل کے شکار بین الافغان امن مذاکرات کی راہ میں موجود بڑی رکاوٹ دور ہونے کا امکان ہے۔
