افغان ٹیم کے کپتان کے ایک انکشاف کے مطابق پاکستان سے شکست کے بعد افغان ٹیم کی نیندیں اڑ گئی تھیں۔
تفصیلات کے مطابق بدھ کو گرین شرٹس کے ہاتھوں عبرت ناک شکست کے بعد افغان ٹیم کے لیے رات کی نیند بھی حرام ہو گئی تھی، جس کے لیے انھیں نیند کی گولیاں کھانی پڑ گئیں۔
افغان ٹیم کے کپتان محمد نبی نے انکشاف کیا ہے کہ انھیں گرین شرٹس سے ہارنے کے بعد سونے کے لیے نیند کی گولیاں کھانی پڑیں تھیں۔
یہ انکشاف انھوں نے جمعرات کو بھارت کے خلاف ٹاس جیتنے کے بعد پاکستان سے شکست کھانے پر گفتگو کرتے ہوئے کیا۔
’نسیم شاہ مستقبل کا چیمپئن‘ چھکوں کی ویڈیو دیکھیں
محمد نبی نے بتایا کہ میچ ہارنے کے بعد ہمارے کئی کھلاڑی گراؤنڈ چھوڑ کر چلے گئے تھے، ٹیم کے کھلاڑی جب ہوٹل پہنچے تو انھوں نے گرین ٹی لی اور پھر نیند کی گولیاں بھی کھائیں۔
دوسری جانب بھارت کے خلاف میچ میں شکست کے بعد اسسٹنٹ افغان کوچ اور سابق افغان کھلاڑی رئیس احمد زئی نے بھی اعتراف کرتے ہوئے کہا کہ پاکستان کے خلاف میچ میں نہ صرف کھلاڑی بلکہ پوری قوم ٹینشن میں تھی، اس میچ میں شکست کے بعد سب افسردہ ہیں۔
رئیس احمد زئی نے کہا شکست کے بعد اس رات کوئی بھی کھلاڑی سو نہیں پایا، وہ ہمارے لیے ایک برا دن تھا۔
