امریکی امداد معطل ہونے کے بعد غربت تلے زندگی گزارے والے 60 لاکھ افراد کو بمشکل صرف چائے روٹی پر ہی گزارا کرنا پڑ سکتا ہے۔
غیر ملکی میڈیا کے مطابق اقوام متحدہ کے ذیلی ادارے ورلڈ فوڈ پروگرام کے افغانستان میں سربراہ ہساوی لی نے انکشاف کیا ہے کہ امریکا کی جانب سے امداد معطل ہونے کے بعد ان کا ادارہ ایک کروڑ 20 لاکھ افغانوں میں سے صرف نصف کو ہی خوراک فراہم کر پائے گا۔
ڈبلیو ایف پی سربراہ نے کہا کہ اس صورتحال میں بقیہ 60 لاکھ افغانی شہریوں کو زندہ رہنے کے لیے صرف چائے روٹی پر گزارا کرنا پڑے گا وہ بھی مانگ تانگ کر۔
یاد رہے طالبان حکومت پر لگی عالمی پابندیوں کے باعث ملک میں معاشی سرگرمیاں نہ ہونے کے برابر ہیں جب کہ ملکی زراعت سوا چار کروڑ آبادی کی خوراک کی ضرورت مکمل طور پر پوری نہیں کر پا رہی۔
اس صورتحال میں افغان شہریوں کو بھوک اور موت سے بچانے کے لیے ورلڈ فوڈ پروگرام لاکھوں افغانوں کو غذا فراہم کر رہا تھا جو امریکی امداد رکنے سے بہت کم رہ گئی ہے۔ یوں مملکت میں غربت و بیماری و بیروزگاری میں اضافہ ہو گا۔
