اسلام آباد: پاکستان نے رواں ہفتے دوحہ قطر میں افغانستان پر مذاکرات میں شرکت کا فیصلہ کر لیا ہے۔
سفارتی ذرائع کے مطابق دنیا بھر کے افغانستان پر خصوصی نمائندے پہلی بار دوحہ مذاکرات میں افغان طالبان کے سامنے بیٹھیں گے، تیسرے دوحہ مذاکرات میں 25 ممالک کے سفارت کاروں اور خصوصی نمائندوں کی شرکت متوقع۔
سفارتی ذرائع کا کہنا ہے کہ دوحہ مذاکرات میں پاکستان کے نمائندہ خصوصی برائے افغانستان آصف درانی اور احمد وڑائچ پاکستان کی نمائندگی کریں گے، احمد نسیم وڑائچ وزارت خارجہ میں اسسٹنٹ سیکریٹری مغربی ایشیا ہیں۔
آصف درانی اور احمد نسیم وڑائچ کی قیادت میں وفد آئندہ چند روز میں دوحہ روانہ ہوگا، اقوام متحدہ کی میزبانی میں تیسرے 2 روزہ دوحہ مذاکرات 30 جون کو شروع ہوں گے، مذاکرات اور کانفرنس میں افغان عبوری حکومت باقاعدہ شرکت کرے گی۔
دوحہ مذاکرات میں میزبان یو این جنرل سیکریٹری اور نمائندہ خصوصی بھی شرکت کریں گے۔
