ممبئی : بھارت کی مشہور زمانہ فلم "ڈسکو ڈانسر” 41 سال بعد ایک بار پھر سیکوئیل کے ساتھ واپسی کے لیے تیار ہے۔
سال 1982میں ریلیز ہونے والی متھن چکرورتی کی فلم” ڈسکو ڈانسر” بلاک بسٹر فلم تھی جو دیکھتے ہی دیکھتے پوری دنیا میں مقبول ہوگئی، اس فلم کی کامیابی کی خاص وجہ اس کا میوزک تھا جو اس زمانے مشہور موسیقار بپی لہری نے دیا تھا۔
اب بالی ووڈ کے مخبروں نے خبر دی ہے کہ 41 سال بعد متھن چکرورتی کی فلم ڈسکو ڈانسر اپنے سیکوئیل کے ساتھ دوبارہ پردہ اسکرین پر جلوہ گر ہوگی۔
اس فلم کا نام "ڈسکو ڈانسر ٹو” ہے فلم کے ہدایت کار نیتن کمار گپتا ہیں جو اس سے قبل "سیونی” اور "لو ان یوکرین” نامی فلموں میں اپنی صلاحیتوں کے جوہر دکھا چکے ہیں۔ فلم کی شوٹنگ روس سمیت مختلف بین الاقوامی مقامات پر کی جائے گی۔
فلم ڈسکو ڈانسر متھن کے کردار جمی کے گرد گھومتی ہے، جو ایک اسٹریٹ ڈانسر ہے اور بعد میں بہت بڑا ڈسکو اسٹار بن جاتا ہے۔
سال 1982 میں اس فلم کی ریلیز کے بعد اس کے مشہور گانوں جمی جمی آجا آجا، آئی ایم آ ڈسکو ڈانسر، اور یاد آ رہا ہے تیرا پیار نے فلم بینوں کے دلوں کو دھڑکا دیا تھا اور یہ فلم اپنے دور کی کامیاب ترین فلم بن گئی تھی۔
رپورٹ کے مطابق ڈسکو ڈانسر کا کردار متھن کے بغیر ادھورا ہے، مڈ ڈے کی رپورٹ کے مطابق فلم میکرز دوسری قسط کے لیے اداکار کو شامل کرنے کے خواہاں ہیں۔
ذرائع نے پبلیکیشن کو بتایا ہے کہ متھن سے ابھی تک رابطہ نہیں کیا گیا ہے لیکن غالباً وہ جمی کے اہم کردار میں نظر آئیں گے۔
