بھارت میں روسی سیاستدان اور سیاح کی پُراسرار ہلاکت کے بعد صدر ولادیمیر پیوٹن کا ایک اور سخت ناقد اچانک لاپتا ہوگیا۔
میڈیا رپورٹس کے مطابق ریاست اڈیشا کی پولیس نے اس شہری کی تلاش شروع کر دی اور بتایا جا رہا ہے کہ وہ یوکرین پر روسی حملوں کا سخت مخالف تھا۔
لاپتا شہری کو اکثر سڑکوں پر پلے کارڈز اٹھائے دیکھا گیا جس پر روس مخالف نعرے درج ہوتے اور ساتھ ہی وہ اپنی مالی مدد کی درخواست بھی کرتا۔
اسے حال ہی میں بھونیشور کے ریلوے اسٹیشن پر پلے کارڈز کے ساتھ دیکھا گیا تھا جہاں لوگوں نے اس کی تصاویر بھی بنائی تھیں۔
پولیس نے اس کی تلاش شروع کر دی ہے۔
متعلقہ: روسی سیاستدان اور پیوٹن کے ناقد کی بھارت میں پُراسرار موت
یاد رہے کہ کچھ روز قبل ریاست اڈیشا میں روسی سیاستدان اور بزنس ٹائیکون پاول انتوف پُراسرار طور پر ہلاک ہوگئے تھے۔
پاول انتوف اڈیشا کے ایک نجی ہوٹل میں ٹھہرے ہوئے تھے اور 24 دسمبر کو تیسری منزل سے گر کر چل بسے جس کی تحقیقات کی جا رہی ہیں۔
سیاستدان کی ہلاکت کا واقعہ ٹھیک دو روز قبل 22 دسمبر کو روسی سیاح کی بھارت میں پُراسرار موت کے بعد سامنے آیا تھا جسے مقامی میڈیا نے چھپنے کی کوشش کی تھی۔
پاول انتوف روسی صدر ولادیمیر پیوٹن کے ناقد تھے۔ انہوں نے یوکرین پر حملہ کرنے پر روسی حکومت کو تنقید کا نشانہ بنایا تھا۔
