اسلام آباد: رواں مالی سال کے پہلے 4 ماہ میں ٹریکٹرز کی فروخت 87 فیصد تک بڑھ گئی۔
تفصیلات کے مطابق ایک طرف ملک میں گاڑیوں کی فروخت میں کمی کا سلسلہ جاری ہے جبکہ دوسری جانب ٹریکٹرز کی فروخت میں اضافہ دیکھا گیا ہے۔
زرعی ترقی کے سبب ٹریکٹرز کی سیلز میں اضافہ ہوا، رواں مالی سال کے پہلے 4 ماہ میں ٹریکٹرز کی فروخت 87 فیصد بڑھ گئی ہے، ٹریکٹرز کی فروخت 9258 یونٹس سے بڑھ کر 17296 یونٹس ہوگئی۔
دوسری جانب کار کی فروخت میں بتدریج کمی کا سلسلہ جاری ہے، جولائی تا اکتوبر گاڑیوں کی فروخت میں 47 فیصد کمی دیکھی گئی، مالی سال کے 4 ماہ کے دوران گاڑیوں کی فروخت 39700 یونٹس سے گھٹ کر 20871 یونٹس رہ گئی۔
آٹو موٹیو مینیوفیکچرز ایسوسی ایشن کے مطابق گاڑیوں کی قیمت میں اضافہ، شرح سود اور ایل سیز کے مسائل کے سب گاڑیوں کی فروخت گھٹ گئی ہے جبکہ وین اور جیپ کی فروخت میں 31 فیصد اضافہ ریکارڈ کیا گیا
پاکستان آٹو موٹیو مینیوفیکچرز ایسوسی ایشن کے مطابق دو اور تین ویلرز کی فروخت 4 لاکھ 12 ہزار 825 سے گھٹ کر 3 لاکھ 70 ہزار 966 یونٹس رہی۔
