کراچی : پاکستانی اداکار احد رضا میر کو امریکہ میں مقبول ترین تھیٹر ڈرامے میں بہترین اداکاری کرنے بین الاقوامی ایوارڈ کیلئے نامزد کردیا گیا ، بیٹی مچل ایوارڈ کی تقریب چوبیس جون کو منعقد کی جائے گی۔
تفصیلات کے مطابق پاکستان کے باصلاحیت اداکار احد رضا میر کو مقبول ترین تھیٹر ڈرامے ”ہیملٹ، اے گھوسٹ اسٹوری“ میں بہترین اداکاری کرنے پربین الاقوامی ’بیٹی مچل ایوارڈ‘ کے لیے نامزد کیا گیا ہے۔
ڈراما سیریل ”یقین کا سفر“ سے شہرت حاصل کرنے والے اداکار احد رضا میر نا صرف پاکستانی شوبزمیں اپنے فن کا لوہا منوارہے ہیں، بلکہ بیرون ممالک بھی اپنی صلاحیتوں سے پاکستان کا نام روشن کررہے ہیں۔
”ہیملیٹ“ میں ادا کیے گئے اپنے کردارکے بارے میں احد کا کہنا تھا کہ میری والدہ یہ ڈراما دیکھنے تھیٹر آئی تھیں، میری پرفارمنس دیکھنے کے بعد انہوں نے کہا کہ وہ مجھے پہچان نہیں سکیں اورمجھے یہ کردارادا کرتے ہوئے دیکھ کرانہیں خوف محسوس ہوا، اس وقت میں نے سوچا کہ میں نے اچھی اداکاری کی ہے۔
خیال رہے کہ 22 ویں ”بیٹی مچل ایوارڈ “کی تقریب رواں ماہ 24 جون کو منعقد کی جائے گی۔
مزید پڑھیں : احد سجل منگنی: میجر جنرل آصف غفور کی مبارک باد
یاد رہے حال ہی میں پاکستانی گلوکار و اداکار احد رضا نے گزشتہ دنوں سماجی رابطے کی ویب سائٹ پر باضابطہ سجل علی کے ساتھ منگنی کا اعلان کیا تھا۔
انہوں نے اپنے دوستوں اور مداحوں کو اس خوشخبری سے آگاہ کرتے ہوئے تمام لوگوں سے دعاؤں کی درخواست بھی کی تھی، عید کے موقع پر منگنی کی خبر سوشل میڈیا کی زینت بن گئی اور سب نے ہی نئے جوڑے کے لیے نیک خواہشات کا اظہار کیا۔
