پاکستان کے معروف اداکار احمد علی بٹ نے وفاقی حکومت سے مطالبہ کیا ہے کہ رمضان ٹرانسمیشن کے بجائے جعلی خبروں پر پابندی لگائی جائے۔
فوٹو اینڈ ویڈیو شیئرنگ ایپلی کیشن انسٹا گرام پر احمد علی بٹ نے اپنی اسٹوری میں لکھا کہ جعلی خبروں، پیڈ نیوز اینکرز، پروپیگنڈے اور ٹی وی پر مذہب کا مذاق اڑانے والوں پر پابندی لگائیں۔
انہوں نے کہا کہ رمضان میں معیاری گیم شوز وقت کی ضرورت ہیں، لیکن ہم سب جانتے ہیں کہ اچھے معیار کے گیم شوز پورے خاندان کے لیے خاص طور پر رمضان میں تفریح کے لیے بہت ضروری ہوتے ہیں۔
احمد علی بٹ نے کہا کہ فہد مصطفیٰ جیسے لوگوں نے ہمیں معیاری تفریح فراہم کرنے کے لیے اپنا سب کچھ وقف کر دیا، ہمیں اس طرح کے شوز پر فخر ہونا چاہیے، اس لیے ان حقیقی مسائل پر توجہ مرکوز کریں جن کا ہمارا ملک سامنا کر رہا ہے۔
خیال رہے کہ وفاقی وزیر برائے مذہبی امور نور الحق قادری نے وزیر اعظم عمران خان کو خط لکھا تھا جس میں عوام کی جانب سے جاری کردہ شکایات کی بنیاد پر رمضان نشریات کے چھ رہنما اصولوں کی ہدایت کرنے کی درخواست کی گئی تھی۔
